شعر گل میرے لگ ڈھائیں نت ماردا میرا سوہنا پتہ نئیں کدوں آوے گا
جیس مطلعے نوں سن کے تساں اونا اے اوہ مطلع پتہ نئیں کدوں آوے گا
رات معراج دی وجد وچ آن کے نین موسیٰ دے کہندے رہے ہون گے
جھٹ کھلو،جھٹ کھلو، سوہنیا جھٹ کھلو فیر موقع پتہ نئیں کدوں آوے گا
مست ہو کے تے چن ویکھ نسدا پھرے آئو محبوب ہر اک نوں دسدا پھرے
تارا اک اک سنو روندا روندا کہوے ماہی میرا پتہ نئیں کدوں آوے گا
سوچ احرام بنھ آکھدی کعبیا! درد کی ہے ترا ایناں روویں کیوں
اشک کعبے دی اکھ چوں ڈھہے آکھدے میرا کعبہ پتہ نئیں کدوں آوے گا
سی کراں تے پتہ مینوں سِر جانا اے ناںکراں تے میں اکھ وچوں کِر جانا اے
ہجر دے غار وچ ڈنگ کھا کھا کہواں کملی والا پتہ نئیں کدوں آوے گا
اج دیوانہ پتہ نئیں کیویں روپیا حوصلہ دیندا خود حوصلہ روپیا
حال رو رو کے دوویں ای بیٹھے ونجا کہن سوہنا پتہ نئیں کدوں آوے گا
نعت اعجاز ہنجواں دی جھولی وچھا جالی ساہویں کدوں دا سنوندا پیا
جہڑا مقطع تسیں آ کے لکھوائو گے اوہ مقطع پتہ نئیں کدوں آوے گا
