(Last Updated On: )
سخی دی یاد وچ جد وی گدا دی اکھ پئی ورھ
بھرن لئی فیر کاسے نوں عطا دی اکھ پئی ورھ
جدوں طائف دیاں پتھراں لئی نیں ہتھ اٹھائے
نبی دا حوصلہ تکیا دعا دی اکھ پئی ورھ
جدوں صدیق غار اندر تہاڈے لئی ڈنگ کھادھے
وفا صدیق دی تک کے وفا دی اکھ پئی ورھ
تہاڈی آل نیں سبھ کجھ تہاڈے لئی لٹایا
جو وجیا تیر اصغر نوں، قضا دی اکھ پئی ورھ
جدوں تھاں تھاں تے جگدے نعت دے دیوے سُوں ویکھے
خوشی دے نال پھر چھم چھم ہوا دی اکھ پئی ورھ
وچھوڑے آپ دے انج کر کے ہے بیمار کیتا
حکیماں حال پچھیا تے دوا دی اکھ پئی ورھ
جنازہ نکلیا اعجازؔ انج ساڈی حیا دا
کریما! کر کرم ہن تے حیا دی اکھ پئی ورھ
