صادق باجوہ(امریکہ)
پھر سے تنہائی در و بام پہ منڈلائی ہے
وہی صحرا ہے وہی بادیہ پیمائی ہے
درد خاموش چلا آتا ہے پاکر تنہا
شبِ فرقت میں کوئی یاد سی لہرائی ہے
کیا زمانہ ہے کہے ظلم کو دنیا احساں
کیسا اندھیر ہے ہر قوم تماشائی ہے
س کو معلوم نوِشتۂِ مقدر کیا ہے
سَطوتِ شاہی ، کہیں کاسۂِ رُسوائی ہے
کوئی بہلائے دلِ زارکو آخر کب تک
ہمنشیں ہے تو فقط اک یہی تنہائی ہے
زندگی دیکھ ! ترا ساتھ نبھایا ہم نے
عمر بھر اپنی وفاؤں کی قسم کھائی ہے
ڈورسانسوں کی بندھی ہو تو غنیمت صاؔدق
ٹوٹ جائے تو یہی زیست کی پسپائی ہے
۔۔۔۔۔۔۔۔۔۔۔۔۔۔۔
خواہشوں کا اک سمندر دل میں ہے
کس قدر سامان اس محفل میں ہے
ہے نظر کی بھی رسائی دور تک
ایک دنیا آنکھ کے اس تل میں ہے
چشمِ حیرت سے ہے قاتل دیکھتا
جان کچھ کچھ تو تنِ بسمل میں ہے
دیدۂِ مجنوں ہے جس کا منتظر
وہ نویدِ جا ں چھپی محمل میں ہے
ڈھونڈتے پھرتے ہیں جس کو در بدر
وہ سکونِ جسم و جاں تودل میں ہے
یوں چلا آتا ہے ٹھکرایا ہوا
دید کا مارا تو پھر محفل میں ہے
ہے تلاش و فکرِ منزل زندگی
منتہائے زندگی منزل میں ہے
فلسفی صاؔدق بھلا سمجھیں گے کیا
راز وہ پِنہاں جوآب و گِل میں ہے
۔۔۔۔۔۔۔۔۔۔۔۔۔۔۔۔۔۔۔
ہے نِہاں خانۂِ دل میں گفتگو
کون ہوں کیا ہوں ، تلاش و جُستجو
روح کی گہرائیوں میں جھانک کر
ڈھونڈتی آنکھیں ہیں کس کو کو بکو
اک صدا لَا تَقنَطُو امیدِ زیست
بے سر و سامانیوں کی آبرو
جانے کیا سرگوشیوں میں کہہ گیا
آئینہ جب بھی ہوا ہے رو برو
ہے رگ و پے میں سرایت کر گئی
تجھ کو پا لینے کی سچی آرزو
احتسابِ حشر کا ہے منتظر
داد خواہ ہو کر پکارے گا لہو
خود غرض انسان سے صاؔدق کبھی
فیض پانے کی نہ رکھنا آرزو
۔۔۔۔۔۔۔۔۔۔۔۔۔۔۔۔۔
راز ہائے دل کبھی کہنے تو دو
ان بھری آنکھوں کو بھی بہنے تو دو
ہے تقاضا مصلت بینی کا بھی
بارِ غم ہائے نہاں سہنے تو دو
خامشی نے زیرِ احساں کر لیا
راز سر بستہ دبے رہنے تو دو
ہو سکے شاید شعورِ ذات بھی
دھڑ کنوں کو کچھ نہ کچھ کہنے تو دو
اختیارِ زندگی کوئی نہیں
اعتبارِ زندگی رہنے تو دو
پھول سے خوشبو جدا ہو کس طرح
عشق کی کوئی خطا رہنے تو دو
روک لو صاؔ دق! رواں سیلابِ غم
دل میں تازہ کچھ لہو رہنے تو دو
