(Last Updated On: )
رُت آگئی عروج دی موسم گیا زوال دا
آون دا وقت ہو گیا اج آمنہ دے لال دا
توحید باغ وچ کھڑے پھل نور دے کہون پئے
ہے زلف دے جہان وچ موسم بڑے کمال دا
مستی دے وچ لُٹئی گئے ڈٹھا جدوں سمندراں
ماذاغ بحر موج وچ چھلاں پیا اچھال دا
کی بن گیا اے سوہنیا چن دی دھمال ویکھ کے
جھلی دھمال کھیڈدی اج حال تک دھمال دا
دل چیر تے جگر گئے سوہنے قدم کمال دے
تک چال مور ہوگیا قیدی کمال چال دا
حیرت پری گویڑ دے جگ وچ گئی کھڑیٔ گئی
آقا دا پیر ویکھیا پتھر جدوں پگھال دا
چٹے مِری اڈیک دے اعجاز وال ہوگئے
آئو کدی حضور حج ہو جاوے وال وال دا
