رضیہ فصیح احمد(امریکہ)
اپنی تقدیر کے اب سارے اشارے ہیں جدا
مان بھی لیجئے کہ اپنے ستارے ہیں جدا
آپ تو دین بھی دنیا کے ترازو تولیں
آپ کے سود الگ اپنے خسارے ہیں جدا
میرا غم آپ کی آنکھوں سے نہ جھلکا ، گویا
آپ کے دکھ ہیں الگ، اور ہمارے ہیں جدا
جام و مینا کوبھی اب شعر بدر کردیجے
آج شعروں کے کنائے و اشارے ہیں جدا
یہ ستوں تو فقط آرائشِ تعمیر ہیں اب
جو سنبھالے ہیں عمارت کو سہارے ہیں جدا
ہجر ہی ان کا مقّدر ہے تو پھر کیا کیجے
ایک دریا ہے مگر اس کے کنارے ہیں جدا
کوئی رضیہؔ یہ بتائے کہ یقیں کس کا کریں
دن کی ہے بات الگ شب کے اشارے ہیں جدا
۔۔۔۔۔۔۔۔۔۔۔۔۔۔۔۔۔۔
شب گزر جائے نکل آتی ہے دھوپ
مطلعٔ غم پر اجل جاتی ہے دھوپ
میرے آنگن میں اتر آتی ہے دھوپ
سکھ کی اک سوغات سی لاتی ہے دھوپ
شام ہوتی ہے تو سوجاتی ہے دھوپ
کس قدر یہ نیند کی ماتی ہے دھو پ
کلبۂ احزاں میں تیری یاد کی
روشنی سی آکے مل جاتی ہے دھوپ
دھوپ میں اترے پرندے سیر کو
ساتھ ان کے ناچتی گاتی ہے دھوپ
اک جگہ ٹکتی نہیں ہے شام کو
اس طرح کچھ وجد میں آتی ہے دھوپ
دھوپ چھاؤں کا وہ منظر دیکھئے
جب درختوں سے بھی چھن آتی ہے دھوپ
سر پہ سورج، پیڑ ہوں بے برگ و بار
تب مسافر کو بھی کھل جاتی ہے دھوپ
دیکھ کر مجھ کو بہت سی چھاؤں میں
ابر سے ، پیڑوں سے جل جاتی ہے دھوپ
آپ ٹھنڈے دل سے رضیہؔ سوچئے
دل جلوں کو راس کب آتی ہے دھوپ
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
شیخ جی بس پارسا ہیں نام کے
لے رہے تھے شب کو بوسے جام کے
دل میں بھی جیسے چراغاں ہوگیا
جب ہوئے روشن ستارے شام کے
دوسروں کے کان میں رس گھولئے
ہم کو رکھئے تشنہ لب پیغام کے
دل میں جب شدّت ہوئی پرواز کی
کٹ گئے حلقے ہمارے دام کے
جور ہوتا ہے زمینوں پر یہاں
اور شکوے چرخِ نیلی فام کے
کام نے رضیہؔ نکمّا کردیا
آدمی ہوتے تھے ہم بھی کام کے
۔۔۔۔۔۔۔۔۔۔۔۔۔۔۔۔۔۔۔۔۔۔
نہ واقعات ہیں بس میں نہ حادثات مرے
سپرد کرد ی گئی ہے یہ کا ئنا ت مرے
قدم اٹھاؤں بہت سوچ کے تو کیا ہوگا
رکھا گیا ہے مقدّر کو ساتھ ساتھ مرے
یہ اہلِ علم کی خیرات بس ہے میرے لئے
ہیں میری روح کے ٹکڑے یہ کاغذات مرے
خریطہ آپ کو دیتی ہوں میں امانت میں
ذرا سنبھال کے رکھئے گا پرزہ جات مرے
یہ میرے خواب بھی میرے نہیں رہے رضیہؔؔ
ہے جب سے دل میں بسی اور کائنات مرے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔
گلچیں سارا باغ جلانے آیا تھا
ظاہر میں تو اور بہانے آیا تھا
وہ جو میرا دل بہلانے آیا تھا
کوئی تازہ زخم لگانے آیا تھا
سرد ہوا کا جھونکا مجھ سے کہتا ہے
میں تو تیرا درد بٹانے آیا تھا
جوکہتا تھا خوابوں کا بیوپاری ہے
و ہ تو سب کے خواب چرانے آیا تھا
دل تو اس کے ساتھ نہیں تھا پہلے بھی
وہ تو اپنی بات نبھانے آیا تھا
اسکا تو استقبال ہوا تھا کانٹوں سے
جو راہوں کے خار ہٹانے آیا تھا
اس کوہو معلوم کہ اس کی قدر گھٹی
وہ جو میرا مان گرانے آیا تھا
وہ آنسو بھی آنچ کی لو سے خون ہوا
جوآنکھوں کی آگ بجھانے آیا تھا
پتھر ہی نے کچلا رضیہؔ ہاتھ مرا
ہاتھ جو وہ دیوار ہٹانے آیا تھا
۔۔۔۔۔۔۔۔۔۔۔۔۔۔۔۔۔۔۔۔۔۔۔
وفورِ شوق میں بے ساختہ نکل کے چلے
کھڑے ہیں اب بھی مسافر وہیں پہ کل کے چلے
مئے وصال کا اک جام لینے آئے تھے
خمارِ وعدہِ فردا پہ بس بہل کے چلے
یہ آدھی رات کی ساعت یہ گھور اندھیارا
یہ ُدرِّ اشکِ ندامت کدھر نکل کے چلے
کبھی نہ خوش ہوئے ہم سے یہ اہلِ دیرو حرم
وضع بھی بدلی بہت راہ بھی بدل کے چلے
چلے چلو کہ ٹھہر جانا ہے اجل رضیہؔ
کٹھن ہے راہ تو انساں ذرا سنبھل کے چلے
