(Last Updated On: )
رکھ یاد ادب نال نبی یاد خدا یاد
لج پال سن لجپال نبی یاد خدا یاد
گھر بار ہے یا غار ، خشی ہے یا غمی اے
صدیق نوں ہر حال نبی یاد خدا یاد
ہے کون بھلا آیا جدوں روڑ بنے لعل
ہاں ، آمنہ دا لال نبی یاد خدا یاد
رکھ لین تلی اُتے بلے ’’نعت دے دیوے‘‘
پھر کہن مِرے بال نبی یاد خدا یاد
بے چین بڑے نین کہ دن رات کرن پیش
ہنجواں دے بھرے تھال نبی یاد خدا یاد
نت درد سمندر نوں میں بُک نال جھٹیناں
ہر موج تے بُک نال نبی یاد خدا یاد
لکھ شکر کہ اعجازؔ بنایا اے ثنا خواں
ہر ساہ تے ہر وال نبی یاد خدا یاد
