پیاری باجی مبارکہ صاحبہ کے وصال پر

صحن ویران ہے، خاموش ہے در تیرے بعد       گھر کسی  طور  بھی  لگتا نہیں گھر  تیرے بعد

شورشِ شعر نہ  شعلہ  نہ  شرر  تیرے  بعد       سُونی  سُونی  ہے ہر  اک  راہ گزر تیرے بعد

اے  شفق رنگ  شمعِ  فکر  مہِ  خوب  بتا!     زیست کس طرح  کرے خود کو بسر تیرے بعد

کون  اب کچلے گا  اے  میرے مسیحا یہ بتا!!      دل کے  اس  درد کا  اُٹھتا  ہوا سَر تیرے بعد

وہ گھٹا  ٹوپ  اندھیرا  ہے کہ  چھٹتا  ہی نہیں     دل کے  افلاک  ہیں  محرومِ سحر  تیرے بعد

روز  دفناتا  ہوں دے کر انہیں یادوں کا کفن      دل دریدہ  تو  بریدہ  ہے  جگر   تیرے بعد

تکتا  رہتا  ہے کتابوں  میں  رکھے پھولوں کو     دل کے جزدان سے  اک  مور کا پر تیرے بعد

سج گیا گو تیرے جانے سے اُدھر کو ہے’’اُدھر‘‘      پر  اِدھر  رہ  نہیں  پایا  ہے  اِدھر تیرے بعد

جس کو طوفان گزرتے ہوئے  دیتے تھے خراج     ہے  ہواؤں  کے  کرم  پر وہ شجر تیرے بعد

چاند ڈوبا ہے  تو  رہ  رہ کے ستارے صاحبؔ

سوچتے اب ہیں کہ جائیں گے کدھر تیرے بعد

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

https://www.punjnud.com/Articlesdetail.aspx?ArticleID=6954&ArticleTitle=Tere%20Baad