(Last Updated On: )
پھول جب لے کے بجلیاں نکلے
شاخ در شاخ آشیاں نکلے
صبح تک میرے ساتھ ساتھ رہے
رات کے سائے مہرباں نکلے
دل نے چھیڑے جو گیت روز ازل
رگ احساس پر گراں نکلے
کر دیا مجھ سے ہمکلام مجھے
آئنے میرے ہم زباں نکلے
جو چھڑکتے رہے نمک دل پر
وہی زخموں کے راز داں نکلے
زندگی کا سفر نہ ختم ہوا
آگے منزل سے کارواں نکلے
جس کو تھی تیری دید کی امید
اشک اس آنکھ سے کہاں نکلے
اے ضیا، آپ بھی با یں غم دل
آشنائے غم جہاں نکلے
٭٭٭
