(Last Updated On: )
پھڑ کے بہاراں دا قلم لکھیا ہوا یا مصطفی
دل موسماں دے ورقیاں دا موہ لیا یا مصطفی
پھُل شاخ دی ڈھاکے کھِڈا رُت باغ دی کر مست دے
مہکار ونڈدی زلف دے کنڈل ہلا یا مصطفی
یاقوت دل بیٹھا لٹا سوہنے لباں دے رنگ تے
آکھے ایہو ای وجد وچ صلِّ علیٰ یا مصطفی
مشرق توں دھمیں دینہ چڑھے مغرب دے وچ شامیں لہوے
پر سوہنیا سورج ترا چمکے سدا یا مصطفی
انگلی دے اج پھر اک ہلارے دی جھلک دے آن کے
سورج غریباں دے نصیباں دا ہٹا یا مصطفی
سر تاج پا نعلین دا اُچی فلک توں ہوگئی
دھرتی لئے نوری قدم کعبہ بنا یا مصطفی
غم دا دینہوں تھل ہجر دے لشکے سَوَے نیزے تے پھر
اعجاز تیرا بہوں تڑفدا آ وی جا یا مصطفی
