پاپا بھوک لگی ہے. خیام نے نیم وا آنکھوں سے سامنے دیکھا تو ماہین کو کھڑے پایا.
پاپا سب لوگ کہاں ہیں۔ پاپا مجھے درد ہو رہا سارے بدن میں.
خیام جانتا تھا دن کی روشنی کے ساتھ وہ سایہ اب ماہین پر اپنا اثر نہیں کر سکے گا لیکن اندھیرا ہوتے ہی وہ واپس قابض ہوجائے گا۔
خیام نے ماہین کو اپنے سینے سے لگا لیا۔
مجھے کیا ہوا ہے پاپا۔ ماہین نے معصومیت سے پوچھا
کچھ نہیں ہوا پاپا کی جان. آپ سیڑھیوں سے گر گئے تھے اور تو کچھ نہیں ہوا۔
مما کدھر ہیں, روشن اور ماہرہ آپی کہاں ہیں. ماہین نے پوچھا
خیام کوئی بے وقوفی نہیں کرنا چاہتا تھا. کیا پتہ وہ بتا دے اور وہ شیطان سن لے, کیوں کہ کسی کے جسم پر قابض ہونے کے بعد شیاطین جسم پر حاوی ہوتے ہیں۔ لیکن جب وہی چیز جسم سے نکل کر اپنے اصلی رنگ میں آئے تو ہوا کی مانند ہو جاتی ہیں۔ معلوم نہیں کیسے مگر یہ باتیں مرشد نے بتائی تھیں.
مما کو چھوڑیں بیٹا, ادھر آئیں پاپا کے پاس۔ خیام نے ماہین کو عابد حسین شاہ کا دیا ہوا زم زم پلا دیا جس سے اس نے الٹی کردی. اس کے موںھ سے خون کے چھوٹے چھوٹے لوتھڑے نکلے. پھر گندا بدبو دار خون اور کٹی ہوئی آنتیں نکلیں. ماہین قے کرتے وقت رو رہی تھی اور اسے دیکھ کر خیام کا جگر کٹ رہا تھا. اس نے ماہین کا چہرہ صاف کیا, اس کا مونھ دھویا اور تمام جگہ صاف کی. خضر ابھی تک غائب تھا. معلوم نہیں زخمی حالت میں کہاں چلا گیا تھا. خیام کے سر میں شدید درد تھا کیونکہ اس کا زخم ٹھیک نہیں ہوا تھا.
++++++++++++++++++
وہ سفر کرتے کرتے تھک چکا تھا اس لیے تھوڑی دیر کے لیے بیٹھ گیا. اس کی آنکھ لگ گئی لیکن تھوڑی ہی دیر میں اچانک شور سے کھل گئی. دیکھا تو سامنے سے ایک بہت بڑا قافلہ جا رہا ہے اور بہت سے لوگ ہیں جو ان قافلے والوں کو مار رہے ہیں. لوگوں کی آہ و بکا, چیخنے چلانے کی آوازیں آ رہی تھیں. غضنفر یہ سب دیکھ کر پریشان ہو گیا.
یہ ہو کیا رہا ہے اور یہ کیا جگہ ہے. میں تو ادریس گوٹھ کے لیے نکلا تھا, راستے میں گاڑی خراب ہو گئی, کوئی مکینک نہ ملا تو ہم پیدل ہی چل پڑے. میرے ساتھ منان تھا جسے میں ساتھ ہی لے آیا تھا, منان کو مرشد نے ساتھ بھیجا تھا. لیکن ……. لیکن یہ کون سی جگہ ہے اور منان کہاں گیا. وہ تو میرے ساتھ ہی سستانے کو بیٹھا تھا.
غضنفر پریشان تھا اس تمام صورتحال سے اور تذبذب کا شکار تھا. اچانک چند لوگوں نے اسے پکڑا اور دھکے دیتے ہوئے قیدیوں میں شامل کر لیا. اسے تمام قیدیوں کے ہمراہ ایک جگہ پر لایا گیا جہاں کچھ لوگوں کو بیدردی سے کوڑوں کے ساتھ پیٹا جا رہا تھا. یہ سب مار کٹائی دیکھ کر غضنفر کا کلیجہ مونھ کو آ گیا.
وہ گھبراہٹ کے مارے چاروں طرف دیکھ رہا تھا, اسے یوں محسوس ہو رہا تھا جیسے یہ کوئی پھانسی گھاٹ ہے. یہاں چھوٹے بچے بھی نظر آئے جس پر غضنفر حیران ہوا کہ یہاں بچوں کا کیا کام ہے. لیکن پھر اس پر انکشاف ہوا کہ بچے یہاں شکایتی کے طور پر موجود ہیں.
چلتے چلتے غضنفر کو ملی جلی چیخ و پکار سنائی دی. جیسے بہت سے مرد و زن تکلیف میں پکار رہے ہوں. یہ آوازیں دور ایک گھاٹی سے آ رہی تھیں جہاں پہنچے پر غضنفر کی ہوائیاں اڑ گئیں. لوگوں کو بڑی بڑی قینچیوں سے کاٹا جا رہا تھا. ان کا جسم ٹکڑے ٹکڑے اور آنتیں بکھری ہوئی تھیں. اس قدر خوفناک منظر دیکھ کر غضنفر چیخنے چلانے لگا.
ہر کوئی تکلیف سے کراہ رہا تھا. بہت سے گھائل لوگوں نے غضنفر کی طرف مدد کو ہاتھ بڑھایا لیکن غضنفر کو ایسا لگ رہا تھا جیسے وہ لوگ اس پر حملہ آور ہونے آ رہے ہیں. پکڑو اسے ……. اس نے یتیم بھتیجی کی زمین پر قبضہ کیا ہے. ایک کریہہ المنظر چیز غضنفر کی جانب بڑھی تو ڈر کے مارے غضنفر نے دوڑ لگا دی.
غضنی جوں ہی بھاگا ….. چاروں طرف اندھیرا چھا گیا. گھپ اندھیرا …… ہاتھ کو ہاتھ سجھائی نہیں دے رہا تھا. غضنفر آوازوں کی جانب کان لگا کر چلتا رہا کہ اچانک اس کو ماہین کی آوازیں آنا شروع ہوگئی. ماموں …… مجھے بچاؤ, ماموں یہ لوگ مجھے مار ڈالیں گے.
غضنفر آگے بڑھتا گیا تو اس کو ماہین ایک کنویں کے اوپر کھڑی نظر آئی …. ہوا میں معلق ….. نیچے کنویں میں آگ جل رہی تھی اور اس کے اندر سے بھیانک آوازیں آ رہی تھیں. پتھر چٹخنے کی آوازیں, دھماکوں کی آوازیں.
غضنی ماموں میں ادھر ہوں ….. ماموں مجھے بچاؤ …… وہ لوگ مجھے مار دیں گے ….. وہ سب بہت برے ہیں ماموں.
غضنی ماہین کی تکلیف پر رونے لگا. وہ ماہین کو نیچے اتارنے کی کوشش کرنے لگا لیکن وہ اس تک پہنچ نہیں پا رہا تھا. جیسے جیسے وہ ماہین کی طرف قدم بڑھاتا, ماہین مزید دور ہوتی دکھائی دیتی.
پھر اس نے ایک جلاد ماہین کے قریب دیکھا جس نے اسے رسی کی طرح بل دینے شروع کر دئیے. غضنی چیختا رہا ….. چلاتا رہا کہ بچی کو مت مارو, کیا بگاڑا ہے اس نے تمہارا لیکن اذیت دینے والا اس کی ایک بھی نہیں سن رہا تھا, ایسے جیسے غضنی اس سے مخاطب ہی نہیں تھا. پھر غضنی کو اچانک محسوس ہوا کہ یہ سب ایک ٹیلی ویژن پر فلم کی صورت چل رہا ہے اور وہ ایک ناظر کی طرح یہ سب دیکھ رہا ہے.
ماہین بیٹا یہ کیا جگہ ہے. کچھ بتاؤ مجھے بیٹا ….. نہیں بتاؤ گی تو ہم تمہاری مدد کیسے کریں گے. غضنفر ماہین سے مخاطب ہوا.
وہ سب بہت گندے ہیں ماموں ….. وہ ان لوگوں کو منع کرتا ہے کہ اس کو مت مارو لیکن اس کی کوئی نہیں سنتا. ماہین بولی
کون منع کرتا ہے, اس کا نام کیا ہے ماہین, بتاؤ بیٹا. غضنفر چلایا
وقت کم ہے ماموں …. میں مر جاؤں گی. مجھے بہت درد ہے ماموں. ماہین رو رہی تھی.
وہ درخت ماموں, یہ سب بولتے ہوئے ماہین نے برگد کی طرف اشارا کیا اور اپنے گلے میں پہنا سیاہ دھاگا غضنی کی طرف پھینک دیا.
“غضنفر صاحب …. غضنفر صاحب ……. کیا ہوا ہے آپ کو, چیخ کیوں رہے ہیں …. رو کیوں رہے ہیں.” منان کے بری طرح جنجھوڑنے پر غضنفر اٹھ بیٹھا اور پاگلوں کی طرح ادھر ادھر دیکھنے لگا.
کیا ہوا آپ نیند میں بول رہے تھے, چیخ رہے تھے اور پھر رو رہے تھے. میں نے آپ کو سونے دیا. مجھے پتہ تھا کہ آپ کوئی برا خواب دیکھ رہے تھے لیکن میں نے جگانا مناسب نہ سمجھا. ویسے بھی آپ بہت گہری نیند میں تھے.
غضنفر گم سم حالت میں منان کی شکل دیکھ رہا تھا. وہ سمجھ چکا تھا کہ یہ سب محض خواب نہیں تھا, اس نے اپنا داہنا ہاتھ دیکھا جس میں وہ سیاہ دھاگہ موجود تھا جو ماہین نے اس کی طرف اچھالا تھا.
آپ پریشان نہ ہوں سب ٹھیک ہوجائے گا غضنفر صاحب. منان بولا.
ہاں, سب ٹھیک ہو جائے گا. غضنفر کو وہ جملہ یاد آیا جو اس کریہہ المنظر شے نے اس کے لیے بولا تھا. “پکڑو اسے ……. اس نے یتیم بھتیجی کی زمین پر قبضہ کیا ہے”. وہ جہنم تھی شاید. اور ماہین جنات کی دنیا میں ہے ابھی. غضنفر بڑبڑایا.
آپ کیا بول رہے ہیں غضنفر صاحب. منان کو غضنفر کی بات سمجھ میں نہیں آئی.
کچھ نہیں ….. چھوڑو میری باتوں کو ……. اور کتنی دور ہو گا ادریس گوٹھ منان. غضنفر نے مضطرب حالت میں منان سے پوچھا.
میں خود پہلی بار آیا ہوں ادھر, مجھے بس سمت بتائی گئی تھی جہاں ہم جا رہے ہیں. منان نے جواب دیا.
رات کا اندھیرا پھیلنے میں تھوڑی ہی دیر باقی تھی. رات کی چادر آہستہ آہستہ روئے زمین پر پھیلتی جا رہی تھی. وہ جلد از جلد ادریس گوٹھ پہنچنا چاہتا تھا, کیوں کہ وہ جانتا تھا کہ رات ہوتے ہی وہ خناس ماہین پر حاوی ہوجائے گا. اس کی گاڑی وہیں رہ گئی تھی اس لیے وہ پیدل چلتے ہوئے جا رہے تھے کہ اچانک سامنے گھنا جنگل نظر آیا.
یہ جنگل ہمیں دور سے تو دکھائی نہیں دیا تھا منان. غضنی حیرت سے بولا
جی ہاں اچانک ہی آگیا سامنے, دور سے شاید ہمیں چھوٹی جھاڑیاں معلوم ہو رہی تھیں. منان بولا
جہاں یہ لوگ کھڑے تھے وہ دوراہا تھا. ایک راستہ مشرق اور ایک شمال مغرب کی جانب مڑ رہا تھا. دونوں مسافر اجنبی تھے اس لیے پریشان ہوگئے.
منان ….. مجھے لگتا ہے ہم غلط جگہ پہنچے ہیں, تم نے محسوس کیا ہے کہ ہم بہت دیر سے چل رہے ہیں لیکن کوئی انسان ہم سے نہیں ٹکرایا. غضنفر پریشانی میں بولا.
ہاں جی صاحب, میں بھی پریشان ہوں کب سے. منان نے جواب دیا.
مجھے لگتا ہے ہمیں جانتے بوجھتے بھٹکایا جا رہا ہے. غضنفر نے تشویش کا اظہار کیا
کیا مطلب …… منان نے پوچھا.
غضنفر نے اپنی جیب سے وہ دھاگہ نکال کر دکھا دیا اور ساری روداد سنا دی. لیکن منان مجھے پکا نہیں ہے کہ میں ٹھیک سمجھ رہا ہوں یا نہیں. بہرحال ہم رستہ بھول چکے ہیں ٹوٹلی, اور ہم اب یا تو کسی گاؤں میں گھسے جا رہے ہیں یا کسی ویرانے میں. غضنفر نے خیال ظاہر کیا. لیکن مجھے لگتا ہے یہ گاؤں نہیں ہے, کیونکہ اگر گاؤں ہوتا تو کوئی انسان تو ہمیں ملتا کسی پکڈنڈی پر یا کہیں راستے میں.
ٹھیک کہہ رہے ہیں آپ. منان بولا.
کیا خیال ہے منان, ایک طرف گھنا جنگل ہے دوسری طرف کچی سڑک …… غضنفر بولا
جنگل کا راستہ ایک بڑے پیڑ کے پیٹ سے نکلتا تھا. اس لیے ان لوگوں نے کچی سڑک کا انتخاب کیا.
جب وہ چلتے چلتے تھک گئے تو منان نے تھوڑی دیر بیٹھنے کا کہا. یہ دونوں ابھی بیٹھے ہی تھے کہ شور سن کر اٹھ کھڑے ہوئے.
یہ شور کیسا ہے! غضنفر نے کہا.
آئیں دیکھتے ہیں. منان بولا
وہ اٹھے اور شمال کی سمت چل پڑے جہاں انہیں تھوڑی دور ایک گاؤں دکھائی دیا. چلتے چلتے وہ گاؤں میں داخل ہو گئے جہاں سب سے پہلے انہیں ایک کچا سا گھر نظر آیا. مٹی کا گھر جس میں لکڑی کا دروازہ اور ایک کھڑکی نظر آ رہی تھی.
غضنفر اب کسی کے رابطے میں بھی نہیں تھا کیوں کہ موبائل کی بیٹری ختم ہو چکی تھی. کمال یہ تھا کہ دونوں کی کلائیوں پر بندھی گھڑیاں بھی بند ہو گئی تھیں. گھر دیکھ کر دونوں اس جانب چل پڑے کہ شاید کوئی انہیں سستانے کو جگہ فراہم کرے یا ادریس گوٹھ کا راستہ دکھا دے.
غضنفر صاحب! میرے خیال سے عشاء کا وقت ہے, نماز نہ پڑھ لیں. منان بولا.
لیکن منان! وضو کرنے کو پانی بھی تو ملے. غضنفر بولا. سامنے والے گھر میں شاید کچھ میسر ہو سکے, ورنہ پھر تیمم سے ہی کام چلانا پڑے گا. غضنفر اور منان نماز عشاء کی نیت سے اس گھر کی طرف بڑھنا شروع ہوئے. بھوک سے منان کے پیٹ میں درد ہو رہا تھا کیونکہ بہت دیر سے دونوں نے کچھ نہیں کھایا تھا. راستے میں کوئی چھوٹا موٹا ہوٹل تو دور کی بات, کوئی ڈھابہ بھی نہیں تھا جہاں رک کر بھوک اور پیاس مٹائی جا سکتی. یہاں آتے وقت اگر کوئی گھر ہی مل جاتا تو وہاں صاحب خانہ کی منت سماجت کر کے زاد راہ حاصل کر لیتے. حیرت کی بات یہ تھی کہ اس گاؤں میں ان لوگوں نے کسی انسان کو ابھی نہیں دیکھا تھا. سارا گاّؤں سنسان پڑا ہوا تھا. سامنے کی گلی ویران نظر آ رہی تھی.
گھر کے دروازے پر کھڑے ہو کر دونوں نے گاؤں کی جانب دیکھا تو وہاں کوئی دکھائی نہ دیا. حیرت ہے عبدالمنان! اتنا بڑا گاؤں ہے لیکن کسی ذی روح کا نام و نشان تک نہیں ہے. غضنفر بولا
یہی گفتگو کرتے ہوئے غضنفر نے گھر کے دروازے پر دستک دی, لیکن کوئی باہر نہ آیا.
شاید گھر ویران ہے. غضنفر بولا
یہ بول کر دونوں اس گھر میں بلا اجازت داخل ہو گئے.
جیسے ہی وہ دونوں گھر میں داخل ہوئے, انہیں ایک آدمی کی بارعب آواز سنائی دی.
“اندر کدھر گھسے آ رہے ہو؟” اچانک ان کے سامنے ایک عجیب وضع قطع کا بوڑھا آدمی آن کھڑا ہوا جسے دیکھ کر دونوں ہی گھبرا گئے. بوڑھے کی داڑھی, مونچھوں حتیٰ کہ بھنوؤں کے بال بھی سفید تھے. ناک لمبی, سپاٹ چہرہ, آنکھیں عام انسانوں کی نسبت دگنا بڑی. بوڑھے کا سر مکان کی چھت سے ٹکرا رہا تھا جبکہ اس نے ہاتھ میں بڑا سا عصا تھام رکھا تھا.
“ہم اجنبی ہیں اس گاؤں میں.” غضنفر نے جلدی سے کہا. “دروازہ کھٹکھٹایا مگر یہ سمجھ کر اندر آ گئے کہ شاید گھر خالی ہے.” غضنفر نے اپنے خشک ہونٹوں پر زبان پھیرتے ہوئے جواب دیا.
“کیسے آئے ہو ادھر تم لوگ؟” بزرگ نے سوال کیا.
راستہ یہاں لے آیا ہمیں. کہیں جا رہے تھے ہم. غضنفر نے جواب دیا دونوں خوش تھے کہ بالآخر انہیں کوئی انسان نظر تو آیا جس سے بات ہو سکے.
اچھا اچھا! وہ سامنے گھڑے سے پانی پی لو. تم دونوں کو کچھ کھانے کی بھی ضرورت ہے. بزرگ نے دونوں کی حالت دیکھ کر جواب دیا.
پانی پینے اور کمرے میں دھری چٹائی پر براجمان ہونے کے بعد غضنفر نے بزرگ سے اس کا نام پوچھا.
کیا ہم آپ کا نام جان سکتے ہیں؟
برآت! بزرگ بولا.
جی میرا نام غضنفر ہے اور یہ ہیں …… غضنی ابھی اتنا ہی بولا تھا کہ بزرگ نے کہا, منان ہیں آپ …….. منان ہیں. برآت نے دونوں کو حیران کر دیا.
ان کو کیسے پتہ ہمارے ناموں کا.
دونوں کو پریشان دیکھ کر برآت مسکرایا.
پریشان نہ ہوں. میں بہت دیر سے کھڑکی میں کھڑا تم دونوں کی باتیں سن رہا تھا. تم لوگ تھوڑا آرام کرو, میں تمہارے کھانے کا بندوبست کرتا ہوں. برآت نے کہا اور دونوں کو مکان میں چھوڑ کر باہر نکل گیا.
کچھ ہی دیر بعد برآت ہاتھ میں چنے, گڑ اور کچھ پتے لے کر واپس آیا. اس نے چنے اور گڑ غضنفر اور منان کے سامنے رکھے اور پتے لے کر صحن کی جانب چلا گیا.
یار یہ چنے میرے حلق میں پھنس جائیں گے. غضنفر نے منان سے کہا. اللہ کا بندہ چنے لے آیا ہمارے لیے. بھئی کوئی روٹی ساگ لاؤ جس سے پیٹ بھر سکے بندہ. غضنفر کو اب غصہ آ رہا تھا
جناب والا! اس کو غنیمت جان کر کھا لیں. ہمیں تو پورے رستے کھانے کو صرف گرد ہی ملی ہے. میرا تو مشورہ ہے کہ چنے گڑ کھا کر پانی پیتے ہیں اور اللہ کا شکر ادا کرتے ہیں جس نے اس بیابان میں کچھ تو حلق سے اتارنے کو دیا. منان کے سمجھانے پر غضنفر نے چنے اور گڑ پھانکنے شروع کر دئیے.
اتنی دیر میں برآت ان کے سامنے قہوہ بنا لایا.
لو پیو یہ قہوہ ساتھ ساتھ. یہ مسلون کے پتوں سے بنا قہوہ ہے. تمہاری تھکاوٹ دور کرے گا.
مسلون کیا ہوتا ہے؟ منان نے پوچھا
یہ بھی کچھ ہوتا ہے. برآت نے منان کو اپنی بڑی بڑی آنکھیں دکھائیں تو اس نے پیالہ تھامنے میں ہی عافیت جانی.
بزرگوار آپ سے ایک بات پوچھوں, اگر اجازت ہو تو. غضنفر نے ادب سے پوچھا.
بزرگوار کیا ہوتا ہے, برآت کہو مجھے. بابا غصے سے ان دونوں کو گھورنے لگا. کیا پوچھنا چاہتے ہو, پوچھو. برآت نے کہا.
اس گاؤں میں ہم جیسے ہی داخل ہوئے …….. یا اس سے پہلے بھی, سارا دن گھومتے رہے لیکن کوئی بھی انسان نہیں ملا. کیا اس پورے علاقے کے لوگ کہیں گئے ہوئے ہیں. غضنفر نے سوال کیا.
برآت خاموش رہا. پھر بولا, تم کسی سے ملنے نکلے ہو.
ہاں چچا جی! کسی سے ملنے نکلے ہیں, پر وہ مل ہی نہیں رہے. امید ہے جلدی مل جائیں گے. منان بولا.
اب برآت غصے سے منان کی طرف دیکھنے لگا.
برآت یہ نادان ہے اس کو معاف کردیں آپ. غضنفر سمجھ چکا تھا کہ برآت کو چچا یا بزرگ کہنے پر غصہ آتا ہے.
کس سے ملنا ہے. برآت نے پوچھا. کوئی اللہ والے ہیں سید جلال شاہ, ان سے ملنے جا رہے ہیں ہم دونوں.
کس جگہ جانا ہے. برآت نے سوال کیا.
ادریس گوٹھ جانا ہے ….. غضنفر بولا
ایسا گاؤں تو ہماری بستیوں میں نہیں ہے.
بستیوں میں نہیں ہے مطلب؟ غضنفر نے سوال کیا.
برآت مسکرا دیا. وہ سمجھ رہا تھا یہ خود نہیں آئے بلکہ یہ ایک اتفاق تھا ورنہ یہاں کیسے آتے.
اس نے تجاہل عارفانہ سے کام لیتے ہوئے دوبارہ سے یوں پوچھا گویا وہ پچھلی باتیں بھول چکا ہو, اچھا گاوں کا نام کیا بتایا تھا تم نے؟
ادریس گوٹھ, منان نے جلدی سے کہا.
اچھا …….. وہ گاؤں, اس گاؤں کو چھوڑ کر ایک اور جہت میں ہے. برآت بولا.
تم نے کس شاہ کا نام لیا تھا؟
اگلا سوال ہوا.
سید جلال شاہ. غضنفر فورا بولا.
وہ تو کسی سے نہیں ملتے. برآت بولا, لیکن یہ سب سن کر تھوڑا پریشان ضرور ہو گیا. غضنفر سمجھ نہیں پا رہا تھا کہ برآت نے پہلے انہی باتوں سے لاعلمی کا اظہار کیا, پھر علمیت کا اقرار کیا اور اب اچانک متفکر بھی ہو گیا ہے.
لوگ بیٹھے رہتے ہیں …… لیکن جلال شاہ کسی سے نہیں ملتے. ہاں اگر اللہ کا خاص کرم ہو کسی پر تب ملاقات ہو بھی جاتی ہے. برآت نے تفصیل بتائی.
لیکن ہم بڑی امید لے کر آئے ہیں. منان نے معصومیت سے کہا
ہمیں اللہ پر بھروسہ ہے وہ ہمیں مایوس نہیں لوٹائے گا. غضنفر نے کہا.
کسی کو جانتے بھی ہو اُس گاوں میں؟ برآت نے پوچھا.
اللہ اور اس کے رسول کے آسرے پر آئے ہیں. ان کے علاوہ تو کوئی نہیں ہمارا. غضنفر بولا .
چلیں پھر میرے ساتھ, اللہ رسول کے مہمان ہیں آپ لوگ, مطلب میرے مہمان ہیں …… آئیں میرے ساتھ. وہ لوگ برآت کے ساتھ گھر سے باہر نکل آئے اور ایک جانب چل پڑے.
چند قدم چلنے کے بعد وہ جس گھر میں داخل ہوئے وہ جھونپڑی نما تھا. ایسا جیسے تنکے اکٹھے کر کے بنایا گیا ہو. گھر دیکھنے میں ایسا تھا گویا ہوا چلے تو اس کی چھت پلک جھپکتے میں اڑ جائے. دیواریں سرکنڈوں کو جوڑ کر بنائی گئی تھیں اور دروازہ بانس کے ٹکڑے جوڑ کر بنایا گیا تھا. تینوں اس گھر میں داخل ہوئے تو گھر صاف ستھرا دکھائی دیا.
برآت نے انہیں عزت سے اس گھر میں بٹھایا اور کہا کہ وہ تھک چکا ہے اور سونا چاہتا ہے.
میرا بیٹا آپ کے ساتھ بیٹھے گا اور باقی باتیں کرے گا. میں اسے بلاتا ہوں. برآت نے یہ کہا اور ایک کمرے میں چلا گیا.
تھوڑی دیر بعد ایک نوجوان دوسرے کمرے سے آتا دکھائی دیا, جس کے ہاتھ میں کھانے کی ٹرے تھی.
اس نے آتے ہی سلام کیا اور دونوں سے حال احوال پوچھا.
غضنفر حیرت سے اسے دیکھ رہا تھا. خوبصورت جوان تھا لیکن نقش اس کے برآت جیسے ہی تھے.
وعلیکم السلام, غضنفر نے کھڑے ہو کر جواب دیا
آنے والے نے بیٹھنے کا اشارہ کیا تو غضنفر بیٹھ گیا.
اس نے دونوں کے سامنے لایا ہوا کھانا رکھ دیا.
غضنفر اللہ کا شکر ادا کرنے لگا کہ انہیں آخرکار ڈھنگ کا کھانا نصیب ہوا.
آپ برآت کے بیٹے ہیں. غضنفر نے سوال کیا.
آپ اکیلے رہتے ہیں. منان نے سوال کیا.
پہلے کھانا کھا لیں پھر کرتے ہیں بات. آنے والے نے کہا.
آپ بھی آئیں کھائیں ہمارے ساتھ. غضنفر نے کہا.
کھاتا ہوتا تو ضرور کھاتا. اس جوان نے کہا.
مطلب … غضنفر نے سوال کیا.
کچھ نہیں مطلب, میں کھا چکا تھا, آپ کھائیں. آپ کھانا کھا لیں بعد میں بات کرتے ہیں.
دونوں نے سیر ہو کر کھانا کھایا.
آپ برا نا مانیں تو آپ سے ایک بات پوچھ سکتا ہوں. جوان نے سوال کیا.
جی پوچھیں. منان نے کہا.
کیا مصیبت آن پڑی ہے جو سید جلال شاہ سے ملنے نکلے ہو؟
وہ میرا دوست ہے ایک, اس کی بیٹی بہت بیمار ہے اسی وجہ سے.
اچھا اچھا ……. کیا بیماری ہے. جوان نے پھر سوال کیا.
غضنفر تذبذب کا شکار تھا, اس کو سمجھ نہیں آ رہی تھی کہ یہ بات ایک اجنبی کو بتائے یا نہ بتائے.
آپ لوگ جنوں بھوتوں پر یقین رکھتے ہیں. جوان نے اچانک سوال کیا.
غضنفر چونک گیا.
پریشان مت ہوں غضنفر میاں. اللہ آپ کی مصیبتوں کو ٹال دے. آمین.
منان اور غضنی پریشان ہونے لگے کہ ان کو کیسے پتا ہے یہ سب.
جوان مسکرا دیا. بیٹا یہ داڑھی دھوپ میں سفید نہیں کی میں نے. آنکھوں میں چھپی الجھن پڑھ سکتا ہوں میں.
بھوتوں پر یقین رکھتے ہو؟ جوان نے پھر سوال کیا.
ہاں قرآن میں لکھا ہے کہ جن ہوتے ہیں. غضنفر نے کہا.
لیکن جنات کی بھی قسم ہوتی ہے دوست ……. ایک وہ جنہوں نے اللہ کے رسول کی بیعت کی, دوسرے وہ جنہوں نے انکار کیا. یہ بے ایمان جن اصل میں انسانوں کے دشمن ہوتے ہیں. جوان بول رہا تھا.
لیکن آپ کی داڑھی تو سفید نہیں ہے, ہاں البتہ آپ کہ ابا برآت کی داڑھی ضرور سفید ہے. منان نے جوان کو ٹوکا
جوان نے سنی ان سنی کر دی.
پھر وہ دونوں سے مخاطب ہوا.
بہت سال پہلے کی بات ہے, ایک گاؤں تھا جس میں بہت سے لوگ رہتے تھے. گاؤں میں ایک سپیرا تھا جس کی ایک نوجوان بیٹی تھی. شکل و صورت سے چند آفتاب, چند ماہتاب. اس کا جسم یوں دمکتا تھا جیسے دھوپ میں آئینہ دمکے. ستواں بدن, لمبے خوبصورت لپیٹ دار بال, سیاہ لمبی پلکیں. اس کا باپ اسے منع کیا کرتا تھا کہ یوں ہر وقت سجا سنورا نہ کر۔ لیکن وہ باپ کی کہاں مانتی تھی۔ پھر ایک دن وہی ہوا جس کا ہری سپیرے کو ڈر تھا. رتیکا ایک شادی میں گئی, جہاں سے گھر واپس آتے ہوئے قبرستان کے رستے پر اسے پانچ سال کا ایک بچہ روتا ہوا ملا.
رتیکا نے سمجھا کہ شادی میں آئے کسی مہمان کا بچہ ہوگا. وہ اس کے پاس گئی اور پوچھا, کس کے بیٹے ہو؟
وہ کچھ بول نہیں رہا تھا, بس رتیکا کو دیکھے جا رہا تھا.
“بھوک لگی ہے”, بچے نہ کہا.
رتیکا نے سوچا اگر بچے کو شادی والے گھر واپس لے جائے گی تو اور بھی دیر ہوجائے گی. ویسے بھی ابا نے جلدی آنے کو کہا تھا اور رتیکا کو تو پہلے ہی دیر ہو چکی تھی. اس لیے سوچنے لگی ……. کیا کرے اور کیا نہ کرے …… پھر اس نے فیصلہ کیا کہ وہ بچے کو گھر لے جاتی ہے اور پہلے اس کو کچھ کھلاتی پلاتی ہے.
سو ….. رتیکا نے بچے کو جیسے ہی اپنی گود میں اٹھایا, اسے یوں لگا جیسے اس کے ہاتھ خالی ہوں ……. رتیکا پریشان ہوگئی. اس نے بچے کے موںھ کی طرف دیکھا تو اس کے ہوش اڑ گئے کیوں کہ جسے اس نے اٹھایا تھا اس کا جسم ایک بچے کا لیکن چہرا داڑھی والے ایک جوان کا تھا جو اب ایک خبیث ہنسی ہنس رہا تھا.
رتیکا چلائی ……. بچاؤ بچاؤ اور بھاگنے کی کوشش کرنے لگی مگر بھاگ نہ پائی.
گھر میں ہری سپیرا بہت پریشان تھا کہ رتیکا نے اتنی دیر کیوں کر دی ہے. جب وہ اپنی برادری کے لوگوں کو اپنے ساتھ لیے رتیکا کو ڈھونڈنے نکلا تو رتیکا اس کو قبرستان کے پاس بے ہوش حالت میں پڑی ملی.
اس رات کے بعد ہری نے اپنی بیٹی کو کبھی مسکراتے نہیں دیکھا. وہ گم سم بیٹھی رہتی تھی, لیکن کبھی کبھار اس پر دورہ پڑ جاتا تو اس کے مونھ سے عجیب آوازیں نکلنا شروع ہوجاتیں. بھیانک آوازوں سے سب کے کان پھٹتے محسوس ہوتے تھے.
بہت علاج کرائے گئے, بہت سے حکیموں کو دکھایا گیا لیکن کوئی اثر نہ ہوا. سب کا ماننا تھا کہ رتیکا پر دیو کا سایہ ہے.
کچھ حکیموں نے کہا, جوان لڑکی ہے اس لیے اس کو دماغ کا مسئلہ ہو رہا ہے. ویسے بھی جو شریف خاندانوں کی لڑکیاں ہوتی ہیں, شادی نہ ہونے کے باعث انہیں ایسے عارضے لاحق ہو جاتے ہیں.
طے یہ پایا کہ رتیکا کی جتنی جلد ہو سکے اس کے منگیتر کبیر سے شادی کرا دی جائے.
شادی کی تیاریاں ہوئیں. رتیکا پر دورے شدید سے شدید تر ہوتے گئے یہاں تک کہ اس پر جن ظاہر ہوگیا. لیکن کبیر پیچھے نہ ہٹا. وہ ہر صورت رتیکا سے شادی پر بضد تھا کیونکہ وہ رتیکا سے محبت کرتا تھا.
لیکن جن نے رتیکا اور کبیر کی شادی نہ ہونے دی اور کبیر کو مار دیا. اب یہ بات دور دراز تک پہنچنے لگی اور سب رتیکا سے دور ہوتے چلے گئے. جب بھی کسی سے کہا گیا کہ رتیکا کا رشتہ لو تو اس نے مارے ڈر کے انکار ہی کیا. کبیر کا حشر سب کے سامنے تھا. اس لیے رتیکا سے بیاہ پر کوئی تیار نہ ہوا. پنڈتوں کا کہنا تھا کہ رتیکا کی شادی ہوجائے تو جن چلا جائے گا, لیکن جن بیاہ ہونے ہی نہیں دیتا تھا.
حکیم نے سمجھایا بھی لوگوں کو کہ جن بھوت کچھ نہیں ہے, بس لڑکی بیمار ہے لیکن کوئی نہیں مانا. پھر رتیکا پر دوروں کی شدت میں اضافہ ہوتا گیا حالت یہ ہوئی کہ رتیکا مردوں سے نفرت کرنے لگی, حتی کہ باپ سے بھی چڑنے لگی. رتیکا گھر میں باپ پر بھی حملہ آور ہو جاتی, سب عزیز رشتہ دار لڑکی کی حالت دیکھ کر بہت پریشان تھے. قریب تھا کہ سبھی رتیکا کی صحت یابی کو ناممکن سمجھ بیٹھتے کہ ایک دن ایک اللہ والے کا اس گاؤں سے گزر ہوا.
تنوع کے فقدان کا عذاب
لاہور ایئرپورٹ سے فلائی کرنے والا ہوموپاکیئن دو تین گھنٹے بعد دوبئی یا دوحہ میں اترتا ہے تو ایک مختلف...