ناہید ورک(امریکہ)
تمام عمر ہمیں کیوں رہے وفا کرتے؟
کبھی تو وہ بھی محبت کا حق ادا کرتے
کسی کی یاد کے موسم بُلا رہے تھے اُسے
وداع نہ کرتے اُسے ہم تو اور کیا کرتے
مرے سکوت سے جن کو گِلے رہے برسوں
اے کاش! وہ مری آنکھوں سے رابطہ کرتے
پڑی تھیں دل میں جو گِرہیں وہ سب ہی کُھل جاتیں
دل و نظر کی اگر نرم تم فضا کرتے
ترا ہی نام ہے جو بس گیا ہے سانسوں میں
کسی کو تیرے سِوا اور کیا خدا کرتے
تُو جانتی ہے مجھے بھی بتا کبھی ناہیدؔؔ
وہ یاد میں مری کیا اب بھی ہیں جگا کرتے؟
۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ناہید ورک
ہمیں چاہت کی شدّت میں کمی اچھی نہیں لگتی
چلو چھوڑو بھی، اتنی بے رُخی اچھی نہیں لگتی
بھلا میں آنسوؤں کو کب تلک روکوں پسِ مژگاں
مرے دل کو یہ تیری برہمی اچھی نہیں لگتی
شبِ مہتاب آئی ہے مگر میرے اس آنگن میں
ترے بن دم بخود ہے چاندنی، اچھی نہیں لگتی
تری نسبت سے گُل کو تتلیاں اب بھی ستاتی ہیں
ہوا کی خوشبوؤں سے برہمی اچھی نہیں لگتی
مگر کیوں آس کے دروازے پر ہے اب تلک بیٹھا؟
دلِ خوش فہم، تیری بے بسی اچھی نہیں لگتی
ہوا اُس سے ملو تو یہ اُسے کہنا کہ تیرے بن
تری ناہیدؔ تیری باولی اچھی نہیں لگتی
۔۔۔۔۔۔۔۔۔۔۔۔۔۔۔۔۔۔۔۔۔۔۔
ناہید ورک
گر دل سے بھلائی مری چاہت نہیں جاتی
کیوں بے حسی کی پھر تری عادت نہیں جاتی؟
برسوں سے مسلِّط ہے ترا طرزِ تغافل
اک پل میں بھلائی یہ اذیّت نہیں جاتی
کیسی ہے تری انجمن آرائی مرے دل؟
تنہا سفرِ شوق کی عادت نہیں جاتی!
پھر اوڑھ لی ہے ہم نے ترے نام کی چادر
پھر دل سے وہی گھر کی ضرورت نہیں جاتی!
کیوں رات کے پردے میں چھپا دن نہیں آتا؟
کیوں آنکھ سے لپٹی یہ مسافت نہیں جاتی؟
کیوں وقت رُکا ہے مری آنکھوں میں ابھی تک؟
کیوں لمس کی تیرے وہ تمازت نہیں جاتی؟
کیوں وصل کی بارش نہیں ہوتی مرے آنگن؟
کیوں ہجر کی ناہیدؔ یہ حدّت نہیں جاتی؟
۔۔۔۔۔۔۔۔۔۔۔۔۔۔۔۔۔۔۔۔۔۔۔
ناہید ورک
تیری راہ میں رکھ کر اپنی شام کی آہٹ
دم بخود سی بیٹھی ہے میرے بام کی آہٹ
کیوں ٹھہر گئی دل میں اُس مقام کی آہٹ
کیوں گزر نہیں جاتی اُس قیام کی آہٹ
رات کے اُترتے ہی دل کی سُونی گلیوں میں
جاگ اُٹھتی ہے پھر سے تیرے نام کی آہٹ
جب یہ دل رفاقت کی کچی نیند سے جاگا
تو مجھے سنائی دی اختتام کی آہٹ
فرقتوں کے بوسیدہ ساحلوں پہ اُتری تو
ہر طرف تھی بس تیرے ہی کلام کی آہٹ
ہاتھ کی لکیروں سے کس طرح نکالوں میں
تیری یاد کے موسم تیرے نام کی آہٹ
بیٹھ جاتی ہے آکر در پہ کیوں مرے ناہیدؔ
تیرے ساتھ کی آہٹ تیرے گام کی آہٹ
