(Last Updated On: )
نبی دے در توں جدوں وار کے نگاہ ٹرے
میں ویکھیا اے کہ راہی نوں چا کے راہ ٹرے
جدوں اشارہ کرو تے کھلووے جھُم جھُم کے
تسیں کہو تے زمانے دا فیر ساہ ٹرے
ہٹے جو پِن کے سخی نوں کدوں سیاپدے نیں
فقیر ہین کوئی یا کہ بادشاہ ٹرے
خدا جہان تے اوہدا کروندا اے چرچا
ترے کرم دی کریما جو گھت کے گاہ ٹرے
حضور سیج سجا جائو بے قراری دی
مِری اڈیک دے ہوٹھاں تے واہ واہ ٹرے
مِرے وساہ دا سکہ جہان تے چلدا
ترے وساہ تے حبیبا مِرا وساہ ٹرے
کِتے نہ ویکھ لے اعجاز اج محمدﷺ دا
دھڑک دھڑک کے جہنم دی ویکھ بھاہ ٹرے
