ناظم خلیلی کی چھ غزلیں

ناظم خلیلی(گلبرگہ)

جس طرح اس کو غیب جہانِ خِفا نہیں

ہم سے وہ زینتِ پسِ پردہ چھپا نہیں

آنکھیں ہیں کاٹ کر شب فرقت لہو لہو

اب کھینچنے کو کچھ رگِ جاں میں بچا نہیں

مالک بس ایک ہی ہے سیاہ و سفید کا

اچھا برا سمجھ لیں تو اچھا برا نہیں

ہاتھ آگئی تو ٹھیک پہ شوقِ بہشت میں

دنیا سے منھ نہ موڑئیے دنیا میں کیا نہیں

پھر لدگئی ہے پھولوں سے ہر شاخِ شاعری

اب پیکرِ بہار وہ ہم سے خفا نہیں

شاید وجود یار ہے پروردۂ خیال

ورنہ وہ ہم سے آج تلک تو ملا نہیں

ہے نظم و ضبط دہر میں کیوں اتنا انتشار

ناظم سے کچھ نہ پوچھیئے ناظم خدا نہیں

۔۔۔۔۔۔۔۔۔۔۔۔۔۔۔۔۔

آسماں ہوں میں جگمگا مجھ میں

پھول بن کر تو مسکرا مجھ میں

لہر بن کر تو دل سے آنکھوں تک

اُٹھ کے یوں شورمت مچا مجھ میں

اپنے ہونٹوں پہ رنگ کر مجھ کو

اپنے گالوں سے گد گدا مجھ میں

دل میں کٹ کر پتنگ سی گرجا

دور سے ڈور مت ہلا مجھ میں

تو ہے قوسِ قُزح کی پچکاری

آشفق بن کے پھول جا مجھ میں

اپنی زلفوں کو منتشر مت کر

اتنا اندھیر مت مچا مجھ میں

تیری آواز تھی کہ دستک تھی

پھر یہ گھنگرو سا کیا بجا مجھ میں

شام ہی سے مہکنے لگتے ہیں

یاد کے پھول جا بجا مجھ میں

خانہ دل ہے اس طرح خاموش

جیسے بیٹھی ہو تو خفا مجھ میں

مجھ میں مہمان بن کے رہ کچھ دن

مالکن بن کے بیٹھ جا مجھ میں

کس کاناظم یہ مجھ پہ سایہ ہے

کون رہتا ہے دوسرا مجھ میں

۔۔۔۔۔۔۔۔۔۔۔۔۔۔۔۔۔۔۔

گردِ شب کہکشاں بنے کیسے

دُردِ معراجِ غم جمے کیسے

شورشِ یاس کیفِ آس ہو کب

یورشِ آرزو تھمے کیسے

کیسے رنگِ گل وفا نکھرے

کاروانِ جفا رکے کیسے

کسے پھر موجزن ہوبادۂ وصل

سیلِ آوارگی تھمے کیسے

باز کیسے ہو باب رمزِ جمال

مرکبِ جستجو سَدھے کیسے

کیسے خوشبو حنا بدست اٹھے

محفل شامہ سجے کیسے

پھر نوا کب سنوں وہ شہد نژاد

پھر گُلِ سامعہ کِھلے کیسے

منظرِ خَدّو خالِ حسن سے پھر

جَدوَلِ باصرہ کھنچے کیسے

پھر وہ گُلہائے قرب کیسے ہنسیں

گلشنِ لامسہ سجے کیسے

قفل گفت و شنید کیسے کُھلے

سِحرِ گویائی سر چڑھے کیسے

یہ کہ پھر جاں برائے جانِ جہاں

جائے یوں کچھ نہ بچ سکے، کیسے !

۔۔۔۔۔۔۔۔۔۔۔۔۔۔۔۔۔۔۔

جنہوں نے ہم پہ کچھ فقرے کسے ہیں

ہم ان کی ذات میں اکثر رہے ہیں

قَصَر لفظوں کا روشن ہوگیا ہے

ترے اجزائے ترکیبی سجے ہیں

ہمیں مرنا ہے جاں میں جاں کا آنا

بدن میں بانس سے اگنے لگے ہیں

کرے ہے فاحشہ مچھلی حکومت

سمندر بدرؔ بوڑھے ہوچکے ہیں

مری بانہیں تری آباد کاری

وہ سارے شہر اب اجڑے پڑے ہیں

محبت اور وفا اجناسِ عنقا

انا نانِ جویں ہے پل رہے ہیں

چلو پتھر اٹھا کر کھینچ ماریں

بہت ناظم خلیلی بھونکتے ہیں

٭٭٭

بشیر بدر کا شعر تھا

سمندر بوڑھے ہو جائیں گے اور اک فاحشہ مچھلی

تمہاری کھیتیوں اور ساحلوں پر حکمراں ہوگی

ناظم خلیلی

دامنِ صبر تار تار کریں

آؤ تم پر یہ جاں نثار کریں

کب تلک موسم خزاں جھیلیں

کب تلک مِنّتِ بہار کریں

کب تلک برگ ہائے خشک چُنیں

اور خوں اپنا صرفِ خار کریں

کب تلک کوئے غم میں مُہر بلب

تیرے جلووں کا انتظار کریں

کب تلک آسماں کے صحرا میں

تارہ تارہ تجھے شمار کریں

کب تلک دشتِ بدگمانی میں

طائرِ حسنِ ظن شکار کریں

کب تلک چُھپ کے چاہِ یوسفؑ میں

قدر دانوں کا انتظار کریں

کب تلک جنسِ لفظ تو لیں ہم

اور گھاٹے کا کاروبار کریں

۔۔۔۔۔۔۔۔۔۔۔۔۔۔۔

یہ شبِ فراق کا خوف ہے کہ ترے حصول کی جستجو

سرِ شام ہی سے یہ دردِ دل مجھے لے کے پھر تا ہے کو بہ کو

میں یقیں کروں بھی تو کس طرح کہ چمن میں فصلِ بہار ہے

وہی رنگ ہے وہی روپ ہے وہی خدّو خال ہیں ہو بہو

مجھے ہے یقین تو آئے گی کہ لگا ہے سب مراداؤ پر

مرا نام بھی مری ساکھ بھی مری زندگی مری آبرو

تو ہی میرا صبر و قرار ہے تو ہی میرا مونس و یار ہے

مراد ن بھی تو مری شب بھی تو مری صبح تو مری شام تو

میں ہونّقوں ساتکوں تجھے مرے منھ سے کچھ نہ نکل سکے

کوئی لاکھڑا کرے گر تجھے کبھی اتفاق سے روبرو

مجھے تیرے دل کا ہے سب تپہ تو ہے جانتا مرا مدّعا

تجھے مجھ سے کرنی ہے بات کچھ مجھے تجھ کرنی ہے گفتگو

جسے اپنے فن پہ گھمنڈ تھا میں وہی ہوں ناظمِ نارسا

اسی شاعری پہ ہوں سرنگوں اسی شاعری سے ہوں سرخرو