مجھ پر سفر ہنسا،مِرا رختِ سفر ہنسا

مجھ پر سفر ہنسا،مِرا رختِ سفر ہنسا
اے ہمسفر! بتا کہ تو کس بات پر ہنسا
حالت پہ میری جب مِرا اپنا ہی گھر ہنسا
سینے کو کوٹتے ہوئے میں ٹوٹ کر ہنسا
دل کا سکون گر تجھے مطلوب ہے تو پھر
روتے ہوئے دلوں کو مِرے چارہ گر ہنسا
اس نے بس اپنے گھر سے نکالا تھا اور پھر
دوشِ ہوا پہ نام مِرا دربدر ہنسا
تو بھی عزیز ،اپنا بھرم بھی عزیز تھا
میں رونا چاہتاتھا مرے دوست! پر ہنسا
خوشبو سے روم روم مہکنے لگا مِرا
آتے ہوئے جو میری طرف نامہ بر ہنسا
سر پر جلے ہوئے کئی خیموں کا بوجھ ہے
دل پھٹ نہ جائیں ان کے،انہیں رہگزر! ہنسا
طاہر ؔ امڈ رہی ہیں لہو رنگ آندھیاں
میں آسمانِ وقت پہ کیا لمحہ بھر ہنسا
۔۔۔۔۔۔۔۔۔۔۔۔۔۔۔۔۔۔