(Last Updated On: )
مجھ کو پھر سے بنا اے مرے کوزہ گر
چاک پھر سے گھما اے مرے کوزہ گر
دل پہ بھی دھول ہے ذہن الجھا ہوا
دھول کو تو ہٹا اے مرے کوزہ گر
خاک ہی خاک کا ہے ٹھکانہ یہاں
خاک میری اُڑا اے مرے کوزہ گر
اِس جہاں، اُس جہاں یا یہاں یا وہاں
میں کہ ہر دم رواں اے مرے کوزہ گر
زندگی کی حقیقت ملی مجھ کو پھر
اب سوا ہو عطا ، اے مرے کوزہ گر
پھر سے رکھ چاک پر مشک ایسا ملا
مہکے جس سے جہاں اے مرے کوزہ گر
“یہ زمیں یہ فلک ان سے آگے تلک”
ہیں ترے ہی نشاں اے مرے کوزہ گر
میں زمانےکی ہر ضرب کھائے ہوئے
لب پہ لائی دعا اے مرے کوزہ گر
