مبشر سعید(فرانس)
انکار کی لذت سے نہ اقرارِ جنوں سے
یہ ہجر کھلا مُجھ پہ کسی اور فسوں سے
یہ جان چلی جائے مگر آنچ نہ آئے
آدابِ محبت پہ ، کسی حرفِ جنوں سے
عُجلت مِیں نہیں ہو گی تلاوت ترے رُخ کی
آ بیٹھ مرے پاس ذرا دیر سکوں سے
اے یار! کوئی بول محبت سے بھرا بول
کیا سمجھوں بھلا مَیں تری ہاں سے تری ہوں سے؟
دیوار کا سایہ تو مجھے مل نہیں پایا
بیٹھا ہوں تری یاد مِیں اب لگ کے ستوں سے
تجھ سے تو مری روح کا بندھن تھا مرے یار
انجان رہا تو بھی مرے حالِ دروں سے
۔۔۔۔۔۔۔۔۔۔۔۔۔۔۔۔۔۔۔۔۔۔
ہیں یار کبھی تو کبھی اغیار ہیں پتھر
اس واسطے کہتا ہوں کہ بیکار ہیں پتھر
اندھوں سے بھی اندھے ہیں یہ بہروں سے بھی بہرے
پتھر ہیں مری فوج کے سالار ہیں پتھر
جب عہدِ حکومت مِیں بھی عزت نہ ملے تو
سمجھو کہ ترے جُبّہ و دستار ہیں پتھر
ہر ایک سیاسی کے مخالف ہیں سیاسی
پتھر کی عداوت مِیں گرفتار ہیں پتھر
مُجھ کو تو یہ لگتا ہے فقط قہر خدا کا
شیشے کی دُکانوں مِیں خریدار ہیں پتھر
مَیں قیسِ زمانہ ہوں ، سو مُجھ پر ہیں برستے
دیکھو تو سہی کتنے سمجھدار ہیں پتھر
۔۔۔۔۔۔۔۔۔۔۔۔۔۔۔۔۔۔۔۔۔۔۔۔
جو رنگہائے رُخِ دوستاں سمجھتے تھے
وہ ہم نفس بھی مرا دکھ کہاں سمجھتے تھ
محبتوں مِیں کنارے نہیں مِلا کرتے
ؔ’’مگر یہ ڈوبنے والے کہاں سمجھتے تھے‘‘
کُھلا کہ چادرِ شب میں بھی وسعتیں ہیں کئی
ذرا سی دھوپ کو ہم آسماں سمجھتے تھے
خزاں کے عہدِ اسیری سے پیشتر، طائر
چمن مِیں موسمِ گُل کی زباں سمجھتے تھے
انہیں بھی دہر کی فرزانگی نہ راس آئی
جو کارِ عشق مِیں سُود و زیاں سمجھتے تھے
کسی کا قُرب قیامت سے کم نہیں تھا سعیدؔ
فقط فراق کو ہم امتحاں سمجھتے تھے
۔۔۔۔۔۔۔۔۔۔۔۔۔۔۔۔۔۔۔۔۔۔۔
تو عشق قبیلے طرفدار نہیں ہے
واعظ تو سمجھدار ہے پر یار نہیں ہے
جُھک جُھک کے مَیں سجدوں مِیں یہی سوچ رہا ہوں
وہ کب ہے نمازی ؟ جسے دیدار نہیں ہے
یہ لشکرِ بُزدل تو وہ لشکر ہے کہ جس کے
سالار کے ہاتھوں مِیں بھی تلوار نہیں ہے
وہ خاک شفا پائے بھلا ، خاکِ شفا سے
شبیرؑ کی الفت مِیں جو بیمار نہیں ہے
مصروف جو رہتا ہے یہاں رقصِ جنوں مِیں
وہ عشق کی دنیا مِیں گنہگار نہیں ہے
یہ وقت کے حاکم ہیں ، یہ ظالم ،یہ لُٹیرے
یہ کھیل تماشہ ہے ، یہ سرکار نہیں ہے
۔۔۔۔۔۔۔۔۔۔۔۔۔۔۔۔۔۔۔۔۔۔
وصل کی روشنی آنکھوں میں سجانے کے لئے
تم ہی سو جاؤ مجھے خواب دکھانے کے لئے
ہم نے لے دے کے یہی ایک محبت کی ہے
آئے تھے دشت مِیں ہم نام کمانے کے لئے
مجھ کو احساس کی چوکھٹ پہ کھڑے رہنا ہے
ظلمتِ شب سے زمانے کو بچانے کے لئے
یہ درختوں کی قطاریں یہ ستاروں کا ہجوم
مجھ کو رکنا ہے یہاں چاند بنانے کے لئے
مفت مِیں دولتِ دنیا بھی کہاں ملتی ہے
بکنا پڑ جاتا ہے خود، عشق کمانے کے لئے
دل بہ دل ہوتے ہوئے در بدری تک آئے
آخری راز کو اپنوں سے چھپانے کے لئے
میری پسپائی پہ خوش ہے ، کہ اسے علم نہیں
جھکنا پڑتا ہے کبھی ٹھیک نشانے کے لئے
مجھ کو پھر دیس مِیں ہی لوٹ کے جانا ہے سعیدؔ
دل لگانے کے لئے، خواب سنانے کے لئے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔
حالتِ حال مَیں کیا رُو کے سناؤں تجھ کو
تو پلٹ آئے تو آنکھوں پہ بٹھاؤں تجھ کو
عالمِ ہوش مِیں مدہوش بنا لوں خود کو
آیتِ حُسن پڑھوں دیکھتا جاؤں تجھ کو
اب مرا عشق دھمالوں سے کہیں آگے ہے
اب ضروری ہے کہ میں وجد مِیں لاؤں تجھ کو !
تو نہیں مانتا مٹی کا دھواں ہو جانا؟؟
تو ابھی رقص کروں ؟ ہو کے دکھاؤں تجھ کو؟؟
کر لیا ایک محبت پہ گزارا مَیں نے
چاھتا تھا کہ مَیں پُورا بھی تو آؤں تجھ کو
عین ممکن ہے ترے عشق مِیں ضم ہو جاؤں
اور پھر دھیان کی جنت مِیں نہ لاؤں تجھ کو
کیوں کسی اور کی آنکھوں کا قصیدہ لکھوں !!
کیوں کسی اور کی مدحت سے جلاؤں تجھ کو!!!
اُس نے اِک بار مُجھے پیار سے بولا تھا سعیدؔ
میرا دل ہے کبھی سینے سے لگاؤں تجھ کو
