ہر تخلیق کار کی خواہش ہوتی ہے کہ اس کی تخلیق کو دوسرے لوگ بھی دیکھیں ، اس جذبہ کو محسوس کریں جو ا س کی تخلیق کے رگ و پے میں لہو بن کر دوڑ رہا ہے۔ اس احساس پر غور کریں جس نے اس تخلیق کو پیکر عطا کیا ہے۔ سنگ تراش ہو یا مصور، معمار ہویا مغنی یا موسیقار سبھی یہ چاہتے ہیں کہ ان کا فن عوام تک پہنچے اور اسے پسند کیا جائے۔ شاعر اور ادیب بھی اس خواہش سے مبرا نہیں ہیں۔ وہ بھی یہی خواہش رکھتے ہیں کہ ان کی تخلیق کو لوگ سنیں اور فن کار کی صلاحیتوں کی داد دیں۔ جب انسان نے شعر کہا ہو گا اور اس کو احساس ہوا ہو گا کہ یہ ایک اچھوتا خیال ہے ، تواس کو دوسروں کو سنانے کے لئے دوڑ پڑا ہو گا۔ اور جب اس کی داد ملی ہو گی تو نہ صرف خوش ہوا ہو گا بلکہ اس داد سے اس کا حوصلہ بھی بڑھا ہو گا یوں اس کے دل میں خوب سے خوب تر شعر کہنے کی خواہش نے جنم لیا ہو گا۔ ابتدائی زمانے میں نشر و اشاعت کی سہولتیں نہیں تھیں۔ لوگ ایک جگہ جمع ہوتے تھے اور اپنی اپنی شعری تخلیقات سنایا کرتے تھے اور سامعین ان تخلیقات کو سن کر کبھی داد دیتے تھے اور کبھی ان پر تنقید بھی کی جاتی تھی۔
وہ مجلس جہاں شعراء اپنا کلام سناتے ہیں مشاعرہ کہلاتی ہے۔ مشاعرے کا یہ سلسلہ آج بھی جاری ہے۔ نشر و اشاعت کی تمام تر سہولتوں کے فروغ کے باوجود مشاعرے کی اہمیت اسی طرح برقرار ہے۔ کیونکہ اس میں شاعر اور سامع کے درمیان راست ربط ہوتا ہے …….کاغذ پر چھپے ہوئے اشعار ہوں یا ریڈیو اور ٹی وی پر سنایا جانے والا کلام ……ان میں شاعر سامع کے خیالات سے محروم رہتا ہے جبکہ مشاعرے میں سامع کا رد عمل شاعر کو اپنے شعر کے حسن و قبح کی طرف توجہ دینے پر مجبور کرتا ہے اور جب شاعر کو اس کے کلام پر داد ملتی ہے تو اسے ایسا محسوس ہوتا ہے جیسے ہفت اقلیم کی دولت مل گئی ہو۔ عرب میں عکاظ کے مقام پر ہرسال ایک میلہ لگا کرتا تھا۔ اس میلے میں عرب کے تقریباً تمام قبائل شریک ہوا کرتے تھے اور ہر فن کے ماہر اپنی ہنر مندی کا مظاہرہ کرتے تھے …. دوسری تفریحات کے علاوہ یہ مقام شاعروں کے لئے اپنے علم و فن کے اظہار کا ایک اہم ادارہ تھا جہاں عرب کے کونے کونے سے سخن گو اور سخن شناس جمع ہوتے تھے۔ اس میلے میں شاعر اپنا قصیدہ پیش کرتا تھا اور جس قصیدہ کو سب سے بہتر قرار دیا جاتا اسے سونے کے پانی سے تحریر کر کے کعبہ کی دیوار پر لٹکا دیا جاتا تھا۔ اس سلسلے میں کئی قصیدہ نگاروں کے نام لئے جاتے ہیں۔ جن کو یہ مرتبہ حاصل ہوا تھا۔ ان قصیدوں کو ’’سبعہ معلقہ‘‘ کے نام سے یاد کیا جاتا ہے۔ اگر غور کریں تو اندازہ ہوتا ہے کہ مشاعرہ تنقید کی ابتدائی منزل ہے۔ یہیں اس بات کا اندازہ ہوتا ہے کہ کلام کیسا ہے اور سامعین کو کس حد تک متاثر کر سکتا ہے۔ شاعر اپنا کلام پیش کرتا ہے اور سامع اس سے اثر قبول کرتا ہے تو بے ساختہ اس کی زبان سے وہ نکل پڑتی ہے …..’’واہ۔ واہ‘‘ اور ’’سبحان اللہ‘‘ یا اسی طرح کے فقرے اس بات کی دلیل ہیں کہ سامع نے اس شعر کو پسند کیا۔ تحسین کا یہ بے ساختہ اظہار داد کہلاتا ہے۔
کبھی کبھی یہ بھی ہوتا ہے کہ شعر پسند نہیں آتا …..ایسی صورت میں بھی ردعمل ہوتا ہے۔ کبھی سامعین سکو اختیار کرتے ہیں اور کبھی شور برپا ہوتا ہے جس سے اندازہ کرنا مشکل نہیں ہوتا کہ سامعین کے نقطہ نظر سے یہ شعر اہمیت نہیں رکھتا۔ چنانچہ زمانۂ قدیم سے آج تک داد ہی وہ پیمانہ ہے جس کے ذریعے سے یہ اندازہ کیا جاتا ہے کہ عوام نے اس شعر سے کیا تاثر قبول کیا ہے اور شاعر کو یہ اندازہ ہوتا ہے کہ اس کے کلام میں کیا خوبی یا خامی ہے۔ مشاعروں کی اپنی ایک مخصوص تہذیب اور اس کی اپنی روایات ہوئی ہیں۔ پرانے زمانے میں جب مشاعرہ منعقد ہوتا تواس کے لئے خصوصی اہتمام کیا جاتا تھا….میر مشاعرہ یا صدر مشاعرہ ایسے شخص کو بنایا جاتا تھا جو عمل و فضل میں سب سے سوا ہوتا اور فن شعر پر مکمل دسترس رکھتا …..جو شاعر کلام سناتا اس کے آگے شمع رکھ دی جاتی تھی …. اور جب وہ سنا چکا تو میر مشاعرہ کی ہدایت پر یہ شمع دوسرے شاعر کے سامنے رکھی جاتی تھی….شمع اس طرح گردش کرتی ہوئی میر مشاعرہ کے سامنے آتی تھی جس کے بعد مشاعرہ کا اختتام عمل میں آتا تھا……ایک اور خاص بات یہ تھی کہ یہاں حفظ و مراتب کا خیال رکھا جاتا تھا۔ مبتدی شعرا کو مشاعرے میں پہلے پڑھنے کے لئے کہا جاتا تھا اس کے بعد نسبتاً تجربہ کا ر شاعر اپنا کلام سناتے تھے۔ جب کوئی شاعر اپنا کلام سناتا اور اساتذہ فن اس کی تعریف کرتے تو یہ تعریف اس شاعر کے لئے سند بن جاتی تھی۔ چنانچہ میر وسودا کے عہد میں ایک مشاعرہ ہوا جہاں ایک نو عمر لڑکے نے غزل پڑھی جس کا مطلع تھا۔
دل کے پھپھولے جل اٹھے سینے کے داغ سے
اس گھر کو آگ لگ گئی گھر کے چراغ سے
اس شعر کو سن کر سودا بے ساختہ چونک پڑے اور بہت تعریف کی تھی۔ اسی طرح اقبال نے اپنی نو عمری میں کسی مشاعرے میں غزل سنائی تھی جس کے ایک شعر پر انھیں بڑی داد ملی اور مرزا ارشد گورگانی نے انھیں بہت سراہا تھا شعر یہ تھا۔
موتی سمجھ کے شان کریمی نے چن لیا
قطرے جو تھے مرے عرقِ انفعال کے
اور اس کے بعد اقبال کی شعری صلاحیتوں کا اندازہ ہوا اور لوگ ان کے کلام کی طرف متوجہ ہوئے۔ مشاعروں میں مزاح، نکتہ چینی اور طنز بھی ہوا کرتا تھا ….لیکن اس پر لوگ ناراض نہیں ہوتے تھے بلکہ یہ ان کی اصلاح کے لئے ممد و معاون ثابت ہوتا تھا۔ انشا نے نوجوانی کے زمانے میں ایک غزل سنائی تھی اس مشاعرے میں سودا بھی شریک تھے۔ شعر یہ تھا۔
گر نازنیں کہے سے برا مانتے ہو تم
میری طرف تو دیکھئے میں نازنیں سہی
سودا نے مسکرا کر کہا ’’دریں چہ شک‘‘ یہ فقرہ شعر کے آخری حصے کی وجہ سے کہا گیا تھا جہاں ’’میں نازنیں سہی‘‘ کے الفاظ آئے تھے ….اس لطیفے کے پس منظر میں اہم بات یہ تھی کہ انشا بہت خوبرو تھے۔ مشاعرے میں اردو کی شعری روایات میں بڑی اہمیت کے حامل ہیں۔ اردو کے علاوہ ہندوستان کی کسی دوسری زبان میں مشاعرہ کا تصور موجود نہیں البتہ ہندی شاعری میں کوی سمیلن کی روایت نے جنم لیا ہے جو اردو کا براہ راست اثر ہے۔
مشاعرے ایک خاص سماجی نظام کی پیدا وار ہیں۔ بادشاہوں ، امراء، نوابوں اور رئیسوں نے جب مشاعروں کی سرپرستی کی تو اس کے پیچھے یہ خواہش بھی چھپی ہوئی تھی کہ علم دوست اور ادب نواز سمجھاجائے۔ اس طبقے نے جب فن شعر کی سرپرستی کی تو شعر گوئی کو مزید فروغ ہوا اور شاعری کو عزت اور شہرت حاصل کرنے کا ایک وسیلہ بنا لیا گیا۔ اس کے علاوہ قدیم زمانے میں سنیما تھا نہ اسٹیج، نہ تھیٹر اور نہ ریڈیو نہ ٹی وی، عوام الناس کے لئے تفریح کا ذریعہ پتنگ بازی، بٹیربازی، مرغ بازی، گانا بجانا اور اسی قبیل کی دوسری چیزیں تھیں ….. لیکن ایک طبقہ ایسا بھی تھا جو شعری تخلیق کو اپنے جذبات کی تسکین کا ذریعہ سمجھتا تھا۔ مشاعرے اسی لئے اہمیت حاصل کر گئے کہ یہ ذہنی مسرت حاصل کرنے کا ایک اہم وسیلہ تھے ….یہاں نہ صرف ادب اور نزاکت شعر کے بارے میں معلومات ہو سکتی تھیں بلکہ اعلیٰ ادبی ذوق کی تربیت بھی ممکن تھی۔ مشاعروں نے خود شعراء کی ذہنی نشو و نما میں بہت اہم کردار ادا کیا ہے۔ مشاعروں کی بدولت ہی شعراء کو یہ محسوس ہوا کہ مبہم اور غیر واضح خیالات سے عوام کے ذہنوں تک رسائی ممکن نہیں …….اور پھر یہ بھی ضروری ہے کہ کوئی اچھوتی بات ایسی انوکھے انداز میں کہی جائے جس سے عوام کا دل جیتا جا سکے اور خود شاعر کی شعری عظمت کا اظہار بھی ہو سکے۔ اسی لئے مشاعرے میں شاعر اپنی بہترین تخلیق پیش کرتا تھا۔ اور اس بات کی کوشش کرتا تھا کہ اس کی کاوش سامعین پر اثر انداز ہو۔ ساتھ ہی وہ اس بات کا بھی لحاظ رکھتا تھا کہ زبان و بیان کے اعتبار سے شعر میں کوئی خامی نہ رہنے پائے۔ مشاعرے میں لفظ کے غلط استعمال پر بھی گرفت ہو سکتی تھی اور شاعر کی بات اسی وقت تسلیم کی جاتی تھی جب وہ اساتذہ فن کے کسی شعر سے سند دے سکے۔ اس طرح سے سند دینے کے لئے ضروری تھا کہ وہ اساتذہ کے کلام سے بھی بخوبی واقف ہو۔
سامعین جب شعر پر داد دیتے ہیں توا س کا مطلب یہ ہے کہ ان کے پاس شعر کا کوئی پیمانہ موجود ہے۔ یہ پیمانہ یا معیار اصل میں سامعین کے ذوق اور وجدان سے وابستہ ہوتا ہے۔ وہ تنقیدی شعور جس کی بنا پر سامع کسی شعر پر داد دیتا ہے ، یونہی نہیں پیدا ہوتا۔ یہ اسی وقت ممکن ہے جب سامع بھی شعر کی ظاہری و باطنی خصوصیات پر سنتے ہیں غور کر سکے۔ اور اگر شاعر میں یہ صلاحیت ہو اور وہ اپنا خیال اسطرح سے پیش کرے کہ سنتے ہی اثر کر جائے تو وہ کامیاب ہو گا……. جس کے نتیجے میں شاعر اور سامع کے درمیان ایک ذہنی ہم آہنگی ہو گی اور ترسیل کی راہ کھل جائے گی۔ لیکن اگر شاعر شعر سنائے اور اس پر خاموشی اختیار کی جائے تو لامحالہ یہ مفہوم نکالا جائے گا کہ یا تو شاعر نے مہمل بات کہی ہے یا پھر سامعین کا ذوق اتنا تربیت یافتہ نہیں ہے کہ شاعر کی ذہنی سطح تک پہنچ سکے۔ دونوں صورتوں میں شعر ناکام ہو گا۔ اردو کی ترقی و ترویج میں بھی مشاعروں کی بڑی اہمیت ہے۔ عوام کو زبان و ادب کی طرف متوجہ کرنے اور فن کی باریکیوں کے ذریعہ ان کے ذہن کو متاثر کرنے میں مشاعرے بہت ممد و معاون ثابت ہوتے ہیں۔ مشاعرے خیال کی مختلف جہتوں کو بھی سامنے لانے میں مددگار ثابت ہوتے ہیں۔ طرحی مشاعروں میں ایک مصرع طرح دیا جاتا ہے۔ اور شریک ہونے والے تمام شعراء اسی ’’طرح‘‘ پر غزل سناتے ہیں۔ یہاں اس بات کا اندازہ کرنے میں آسانی ہوتی ہے کہ کون قادر الکلام ہے اور کس نے لفظ کو اس کی تمام معنوی نزاکتوں کے ساتھ استعمال کیا ہے۔ اس طرح یہ طرحی مشاعرے شاعر کی شعری صلاحیتوں کا امتحان بھی بن جاتے ہیں۔ غیر طرحی مشاعرے وہ ہوتے ہیں جن میں کسی خاص طرح پر لکھنے کی ضرورت نہیں ہوتی….. کسی بھی طرح میں غزل کہی اور سنائی جا سکتی ہے۔ ان مشاعروں میں خیال و فکر کی گہرائی اور اظہار کا منفرد انداز سامنے آتا ہے ….اور خود شاعر کے ذہنی میلان کا بھی بخوبی اندازہ ہو سکتا ہے۔
مشاعروں میں جہاں مبتدی شعراء موجود ہوتے ہیں وہاں اساتذہ فن بھی ہوتے ہیں اور مبتدی شعراء کو جہاں تعریف کے پھول ملتے ہیں وہیں اعتراض کے خار زار میں بھی گھسیٹا جاتا ہے …. یہی وجہ ہے کہ مبتدی شاعر جب تک کسی اساد سے اصلاح نہیں لیتا مشاعروں میں شعر سنانے کی ہمت نہ کرتا ……اور اگر شاگرد کے کسی شعر پر اعتراض کیا جاتا تو پھر استاد اس کی وضاحت کرتا ….. اور اگر شاگرد کے کسی شعر پر اعتراض کیا جاتا تو پھر استاد اس کی وضاحت کرتا اور اعتراض کا جواب دیتا تھا۔ لیکن صرف مبتدی شعرا پر ہی اعتراض نہیں ہوتا تھا بلکہ اساتذہ فن کو بھی اعتراض کا سامنا کرنا پڑتا تھا….. خواجہ حیدر علی آتش اپنے زمانے کے مسلم الثبوت استاد تھے اور ان کے کئی شاگرد تھے۔ آتش نے ایک بار کسی مشاعرے میں غزل سنائی جس میں یہ شعر بھی تھا۔
دختر رز مری مونس ہے مری ہم دم ہے
میں جہاں گیر ہوں وہ نورجہاں بیگم ہے
بعض لوگوں کے قریب ’’دم‘‘ کا قافیہ بیگم درست نہیں کیونکہ بیگم ترکی لفظ ہے اور ’’گ‘‘ پر ضمہ ہے جب کہ ’’دم‘‘ کی دال پر فتحہ ہے لیکن اردو والے بیگم کی ’’گ‘‘ کو بالفتح ہی کہتے آئے ہیں۔ اس لئے آتش نے جواب دیا کہ اگر ترکی میں شعر کہا جائے تو بیگُم کہیں گے …..میں نے تو اردو میں کہا اور اردو میں بیگَم رائج ہے۔ عوام میں جو رائج ہو گا وہی فصیح ہو گا…..اس لئے اس میں کوئی غلطی نہیں ہے …..لیکن یہ تو اساتذہ فن کی بات ہے۔ یہ لوگ تھے جنھوں نے زبان کو نکھارا اور اپنے خون جگر سے اردو کی آبیاری کی۔ مبتدی شعراء کے لئے اسی وجہ سے یہ ضروری تھا کہ وہ پہلے اصلاح لیں اور اپنے کلام کو کسی استاد کے پاس پیش کر کے اپنی غلطیاں درست کرائیں۔
اصلاح کا مفہوم ہے درست کرنا …. فن شعر میں اس لفظ سے مراد یہ ہے کہ مبتدی شاعر اپنے کلام پر کسی استاد فن کی رائے لے اور غلطیوں کو دور کرے۔ یہ غلطیاں عروض کی بھی ہو سکتی ہیں اور زبان و بیان کی بھی ….عروضی غلطیوں کا مطلب یہ ہے کہ شعر وزن سے گر جائے یا مصرعے کی بحر بدل جائے، استاداس قسم کی غلطیوں کی نشاندہی کرتا ہے اور اسی غلطیوں کو ٹھیک کر کے شعر کو موزوں بناتا ہے۔ زبان و بیان کی غلطیاں بھی مبتدی شعراء کے پاس ہو سکتی ہیں جیسے مذکر و مونث کا استعمال علامت فاعل یعنی ’’نے ‘‘ کی غلطی اور غیر واضح انداز وغیرہ۔ اساتذہ چوں کہ فن کے ماہر ہوتے ہیں اس لئے ان سے ایسی تمام غلطیوں پر اصلاح لی جاتی ہے تاکہ جب شعر مشاعرے میں پیش کیا جائے تو اس پر اعتراضات نہ کئے جائیں۔ یہ اصلاحیں جہاں شعر کو سڈول بناتی ہیں ان سے ایک فائدہ یہ بھی ہوتا ہے کہ مبتدی شاعر ایسی غلطی دوبارہ نہیں کرتا اور شعر کہنے کے بعد خود ہی اس پر نظر ڈال کر اپنی خامی تلاش کر سکتا ہے۔
——————٭٭——————–