معیدؔ رشیدی کی چھ غزلیں

معیدؔرشیدی(کلکتہ)

ہر قدم ایک امتحاں سا ہے

دل مرا ٹوٹتا مکاں سا ہے

رات کالی ہے آج کیوں اتنی

ہر طرف کیوں دھواں دھواں سا ہے

تیری خوشبو بسی ہے سانسوں میں

گھر مرا ایک گلستاں سا ہے

جی رہا ہوں میں تیرے سایے میں

تیرا آنچل بھی آسماں سا ہے

تیز طوفاں ہے اور مری کشتی

حوصلہ میرا بادباں سا ہے

زندگی مختصر کہانی ہے

ایک لمحہ بھی داستاں سا ہے!

۔۔۔۔۔۔۔۔۔۔۔۔۔۔۔۔۔۔۔۔۔۔۔۔

رفتہ رفتہ ٹوٹ گیا

دل کا مارا ٹوٹ گیا

اوڑھ لی چادرماضی کی

حال سے رشتہ ٹوٹ گیا

صبح نے دستک دی جس دم

رات کا قصّہ ٹوٹ گیا

دھوپ کی شدّت اور سراب

پھر اک پیاسا ٹوٹ گیا

پھر ویران ہوا آکاش

پھر اک تارہ ٹوٹ گیا

ایک ذرا سی بات ہوئی

اور آئینہ ٹوٹ گیا

۔۔۔۔۔۔۔۔۔۔۔۔۔۔۔۔۔۔۔۔۔۔۔

پیاس نے جب کہا پانی پانی

جوشِ دریا ہوا پانی پانی

جب پڑی اپنے گریباں پہ نظر

شرم سے ہو گیا پانی پانی

اـــس طرف جوش میں تھے کتنے فرات

اِس طرف شور تھا پانی پانی

گاؤں کی کچّی سڑک ہوں میں بھی

ابر برسا،ہوا پانی پانی

 سلسلہ ختم ہوا خشکی کا

راستہ اب ہوا پانی پانی

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

تھی کل بھی بہت پیاس کی ماری ہوئی دنیا

ہے آج بھی احساس کی ماری ہوئی دنیا

دن میں تو ملاقات کی صورت ہی الگ تھی

تھی رات ملی یاس کی ماری ہوئی دنیا

بے گور و کفن لاش کی مانند کھڑی ہے

 مدّت سے یہاں آس کی ماری ہوئی دنیا

دریاؤں کو دامن میں لیے گرمِ سفر ہے

صدیوں سے یہاں پیاس کی ماری ہوئی دنیا

دیکھو ،پہ تماشا نہیں عبرت کی نظر سے

ہے گوہر و الماس کی ماری ہوئی دنیا

۔۔۔۔۔۔۔۔۔۔۔۔۔۔۔۔۔۔۔

آنکھوں میں اشک،سینے پہ پتھر لیے ہوئے

گھر سے چلا ہوں صبر کی چادر لیے ہوئے

گاؤں کے اک مکان کی چوکھٹ کی روشنی

آتی ہے روزخواب میں منظر لیے ہوئے

یہ کیسا شہر ہے یہاں اک دوسرے سے لوگ

ملتے ہیں آستین میں خنجر لیے ہوئے

پیراک! تو اِن آنکھوں کی گہرائیاں نہ پوچھ

یہ چشمِ تر ہیں ایک سمندر لیے ہوئے

میں ٹوٹ کر بھی جی رہا ہوں اس امید پر

آئے گا کوئی پیار کا ساغر لیے ہوئے

اک شخص کی اڑان تصوّر سے بھی بعید

اک شخص پھر رہا ہے کبوتر لیے ہوئے

۔۔۔۔۔۔۔۔۔۔۔۔۔۔۔۔۔۔۔۔۔۔۔۔

لٹنے کا اپنے میں نے کوئی غم نہیں کیا

لیکن غرورِ وقت پہ سر خم نہیں کیا

میں جل رہا تھا کب سے مسائل کی دھوپ میں

پھر بھی مرے وجود نے ماتم نہیں کیا

یہ سوچ کر کہ کم نہ ہوکچھ لذّتِ  خلش

زخمِ جگر کے واسطے مرحم نہیں کیا

جب شدّتِ تپش میں جھلسنا ہوا نصیب

پھر گل نے بھی تصورِ شبنم نہیں کیا

تھوڑی سی روشنی تھی مگر وہ بھی چھن گئی

میں نے دیارِ شب میں سفر کم نہیں کیا

تاریخ ہے گواہ کہ دنیا میں وقت نے

ہر شخص کو سکندرِ اعظم نہیں کیا