مری طرح سے ہو مٹنا اگر تو یوں کیجئے

مری طرح سے ہو مٹنا اگر تو یوں کیجئے
کسی شقی کے لئے اپنے دل کا خوں کیجئے

نہ وا ہو گر در میخانہ تو، بہ صبر جمیل
خدا کا شکر بہ ایں حالتِ زبوں کیجئے

دنوں کو توڑیئے، راتوں کو کیجئے پامال
ہوا میں آگ جو بھڑکا دے وہ جنوں کیجئے

بکھیریئے کوئی آواز، مثل شورِ خیال
تو شہر ہوش میں اک فتنۂ فسوں کیجئے

یہ شہر ہے کہ ہے محجر، نہ سوچئے ہرگز
ہر ایک سنگ سے دل بستگی فزوں کیجئے

دکن ۱؎کی یاد میں اسلمؔ اب اپنے شام و سحر
نہ بے چراغ و بے آفتاب یوں کیجئے
۔۔۔۔
۱؎ حید آباد۔ کہ اک شہر۔ تمنا و خیال
٭٭٭