مرے دل میں رقص کا رنگ جما مرے گھر میں ڈال دھمال

مرے دل میں رقص کا رنگ جما مرے گھر میں ڈال دھمال
اے یار نکل پس منظر سے منظر میں ڈال دھمال
لے جسم کا پنجرہ پنجوں میں اور ‘‘ ہْو ‘‘ کا زور لگا
تْو مار اڑاری من پنچھی پر پر میں ڈال دھمال
محبوب مرے ، مرے اندر بھی ہے لا محدود جہاں
آ۔۔ پورب پچھم دکھن اور اْتّر میں ڈال دھمال
ابھی جسم کی مٹی دکھتی ہے آنکھوں میں دور تلک
اے درد کچھ اور جدائی کے محشر میں ڈال دھمال
مرے عشق کی بھٹی درد انگارے اور ذرا دہکا
مری عقل کٹھالی گلنے تک مرے سر میں ڈال دھمال
تہلیل کا جام اٹھا طاہر مسجد میں گھونٹ چڑھا
ہو مست الست کلیسا میں مندر میں ڈال دھمال
(لفظ ‘‘مندر‘‘ د کی زبر سے بھی مستعمل ہے)
۔۔۔۔۔۔۔۔۔۔۔۔۔۔۔۔۔۔۔۔۔۔۔