منزلِ صبر سے فریاد و فغاں تک پہنچے

منزلِ صبر سے فریاد و فغاں تک پہنچے
ہم ترے ظلم کو سہہ سہہ کے کہاں تک پہنچے

رازِ دل ہے یہی اچھا، نہ زباں تک پہنچے
مشتہر ہو کے نجانے یہ کہاں تک پہنچے

کوچۂ عشق میں سب لوگ جہاں تک پہنچے
بسکہ وہ سب ترے قدموں کے نشاں تک پہنچے

لوگ الفت میں دل و جاں کے زیاں تک پہنچے
مری اس بات کو پہنچاؤ جہاں تک پہنچے

موسمِ گل میں سلامت نہیں جب دامنِ گل
جانے کیا حال ہو جب دستِ خزاں تک پہنچے

اک نشیمن کے جلانے کے میں لوں سو بدلے
ہاتھ میرا جو کبھی برقِ تپاں تک پہنچے

داستانِ غمِ پنہاں نہ ہو کیونکر رنگیں
خوں کے قطرے بھی نظرؔ اشکِ رواں تک پہنچے
٭٭٭