منجو قمر کا پورا نام سید نجی اللہ ید اللہی تھا۔ آغا حشر کی طرح آپ کا نام اردو ڈرامے کے ساتھ جڑا ہوا ہے۔ لیکن ان کی علمی زندگی کا آغاز شاعری سے ہوا۔ میرے خیال میں شاعری اور موسیقی کا چولی دامن کا ساتھ ہے اور چوں کہ منجو قمر کو موسیقی سے بے پناہ لگاؤ تھا اسی لیے شاعری بھی ان کی روح میں بسی ہوئی تھی۔ چودہ برس کی عمر ہی سے ان کے اندر چھپے ہوئے شاعر نے اپنی جولانیاں دکھانی شروع کیں۔ اور آہستہ آہستہ مقامی مشاعروں میں انہیں مدعو کیا جانے لگا۔ شاعر کی حیثیت سے انہیں دنیا کے سامنے روشناس کرانے کا سہرا قائد ملت نواب بہادر یار جنگ کے سر جاتا ہے۔ ان کا ایک شعری مجموعہ ’تجلیاتِ قمر ‘ شائع ہو چکا ہے۔ دوسرا مجموعہ’ رنگ و رباب ‘ کے عنوان سے وہ اپنی زندگی ہی میں ترتیب دے چکے تھے لیکن حیاتِ ناپائدار نے ساتھ نہ دیا۔ ان کے صاحب زادے ممتاز مہدی نے اس مجموعے کو شائع کرنے کا بیڑا اٹھایا جس کے نتیجے میں یہ مجموعہ منظرِ عام پر آ سکا ہے۔
ممتاز مہدی نے منجو قمر پر میری ہی نگرانی میں تحقیقی کام کیاجس پر یونیورسٹی آف حیدر آباد نے انھیں سے بے پناہ لگاؤ تھا۔ ان کے مقالے کا عنوان ’اردو ڈرامے کے فروغ میں منجو قمر کا حصہ ‘ ہے جس پر یونیورسٹی آف حیدر آباد نے انھیں پی ایچ ڈی کی ڈگری عطا کی۔ موضوع چوں کہ ڈرامے سے متعلق تھا اس لیے ممتاز مہدی نے اپنے کام کو اسی دائرے میں محدود رکھا اور ادبی کارناموں کا ذکر کرتے ہوئے منجو قمر کی شعری صلاحیتیوں پر مختصراّّ ذکر کر دیا۔ اور اب اس کمی کو انھوں نے اس مجموعے کی اشاعت کے ذریعے پورا کیا ہے جس کے لیے وہ مبارک باد کے مستحق ہیں۔
منجو قمر بنیادی طور پر اردو شاعری کی ان پائدار روایات سے جڑے ہوئے ہیں جن کا سکہ آج تک چل رہا ہے۔ یہ روایات کوئی کھوٹا سکہ نہیں اور نہ ہی اصحاب کہف کے سکوں کی طرح ہیں۔ روایت نے اردو شاعری کے ہر دور میں اپنا اثر قائم رکھا ہے۔ منجو قمر اسی جاری و ساری روایت کے پاسدار ہیں۔
سردار جعفری ترقی پسندی کے اہم ستون تھے۔ غزل کو انھوں نے بظاہر زیادہ اہمیت نہیں دی لیکن ان کی نظموں میں غزل کا آہنگ نمایاں ہے۔ کچھ ایسی ہی کیفیت منجو قمر کے ہاں بھی نظر آتی ہے۔ انھوں نے اپنی تخلیقات پر عنوان قائم کیے جس کی وجہ سے شائد ان کو نظموں میں شمار کیا جائے۔ لیکن اگر عنوان ہٹا دیا جائے تو پھر چند ایک کو چھوڑ کر انھیں غزل ہی کہا جائے گا کیوں کہ ہر شعر اپنی جگہ مکمل ہے جو غزل کی ایک اہم خصوصیت ہے۔
کچھ شعر دیکھیے :
اہلِ گلشن سے نہ کہنا کہیں رودادِ قفس
روز کا بادِ صبا ہے ترا آنا جانا
جو بھی گزری گزر گئی دل پر
فائدہ کیا ہے اس کہانی سے
معیشت کا یہاں خدشہ وہاں پرسش کا اندیشہ
تفکر سے بری شائد نہ واں ہوں گے نہ یاں ہوں گے
نہ راستے کی خبر ہے مجھے نہ منزل کی
رواں دواں ہے بہر طور کارواں میرا
آج زاہد کو بھی تڑپا جائے گی ماضی کی یاد
باتوں باتوں میں نکل آئی ہے مئے خانے کی بات
چشمِ پرنم کی شعلہ سامانی
گویا جلتی ہے آگ پانی سے
منجو قمر نے اسانذہ کی زمینوں میں بھی شعر کہے ہیں۔ غالب کی غزل ہے
کسی کو دے کے دل کوئی نوا سنجِ فغاں کیوں ہو
منجو قمر کہتے ہیں
قمر دن رات کے شکوے گلے کیا خوب کیا کہنے
ستم گر ہو لقب جس کا بھلا وہ مہرباں کیوں ہو ( نظیرِ شعلہ فشاں)
جلیل مانک پوری کی ایک مشہور غزل ہے
بات ساقی کی نہ ٹالی جائے گی
کر کے توبہ توڑ ڈالی جالے گی
منجو قمر یوں گل افشانی کرتے ہیں
جب نقابِ رخ ہٹا لی جائے گی
عشق کی بنیاد ڈالی جائے گی
اقبال کی ایک غزل کا مطلع ہے :
گیسوئے تابدار کو اور بھی تابدار کر
ہوش و خرد شکار کر قلب و نظر شکار کر
اس زمین میں منجو قمر نے بھی طبع آزمائی کی۔ یہ دراصل اقبال سے ان کی گہری عقیدت کا نتیجہ ہے۔ بہادر یار جنگ بھی تو اقبال کے مداح تھے تو پھر منجو قمر اقبال کے چاہنے والوں میں کیوں کر نہ ہوتے۔ اقبال کا فلسفۂ مردِ مومن منجو قمر کے درج ذیل شعر میں دیکھا جا سکتا ہے۔
ہے یہی رازِ زندگی ہے یہی رازِ بندگی
موت سے تو نہ ڈر کبھی موت کا انتظار کر
اور واقعہ یہ ہے کہ ایک سچا مومن موت سے کبھی خوف زدہ نہیں ہوتا۔ وہ جانتا ہے کہ موت برحق ہے اور کسی وقت بہی آ سکتی ہے۔
اس مجموعے کے آخر میں ایک اور باب شامل کیا گیا ہے جو منجو قمر کی فنِ موسیقی سے گہری وابستگی کا مظہر ہے۔ ممتاز مہدی نے جامع انداز میں منجو قمر کی موسیقی سے آگہی کا ذکر کیا ہے۔ اس کے علاوہ ممتاز مہدی نے منجو قمر کی کچھ ایسی تخلیقات بھی شامل کر دی ہیں جو انھوں نے مختلف ڈراموں کے لیے تحریر کی تھیں۔ اہم بات یہ ہے کہ بیشتر تخلیقات کے ساتھ راگ اور طبلے پر سنگت کی وضاحت کر دی گئی ہے۔
ممتاز مہدی بے اس مجموعے کو مرتب اور شائع کر کے ایک کارنامہ انجام دیا ہے۔ اولاد کا فریضہ ہے کہ وہ اپنے بزرگوں کے پردۂ خفا میں پڑے علمی کارناموں کو محفوظ کرے۔ اس کے لیے میں ممتاز مہدی کو مبارک باد پیش کرتا ہوں۔ میری دعا ہے کہ ان کی یہ کاوش مقبولِ عام ہو۔
***