(Last Updated On: )
کیوں بھلا چھوڑا ہئی اساں کوں یار کجھ سوچیں تاں ہا
تیڈے باہجوں رُل وسائیں دلدار کجھ سوچیں تاں ہا
ڈیکھ کے غربت آ ساڈی کنڈ ولا کے ٹر گئیوں
غیر دے ہتھاں دے وچ ہتھاں کوں پا کے ٹر گئیوں
غیر تے توں کر گئیوں اعتبار کجھ سوچیں تاں ہا
اپنڑی طرفوں پیار دا اظہار توڑے کر ودا
جانیاں ہک وار نئیں لکھ وار توڑے کر ودا
ساڈے وانگوں کئیں نی کرنا پیار کجھ سوچیں تاں ہا
کہڑی گالوں غیر دی دنیا وسا کے خوش ودا ایں
کیوں اساں کوں خون دے ہنجوں رو وا کے خوش ودا ایں
زندگی توں کر ڈتا ای بےزار کجھ سوچیں تاں ہا
بے وفائی وی کریسی بے وفا نہ آکھ سوں
آکھ سوں خود کوں برا تیکوں برا نہ آکھ سوں
کیوں کریندا ایں ایویں تکرار کجھ سوچیں تاں ہا
