(Last Updated On: )
’’جہڑا بندیاں دا شکر ادا نئیں کردا اوہ اللہ دا وی شکر ادا نئیں کردا‘‘(الحدیث(
لکھن لئی بہوں کجھ اے پر میں ایتھے صرف اپنے مرشد کریم دی اوس ہلا شیری دا ذکر کراں گا جیس دے کارن مینوں اللہ پاک نے ایہہ نعتاں دا دیوان سجاون دی توفیق تے ہمت بخشی۔ میری پہلی کتاب ’’نعت دے دیوے‘‘ چھپ کے منظر عام تے آئی تے اوس کتاب ڈاہڈا ناں کھٹیا۔ اوس کتاب دے صدقے اللہ پاک نے مینوں بڑا عزتاں نال نوازیا۔ پورے جگ مینوں آدر تے مان بخشیا۔ او س کتاب وچ لکھیاں نعتاں میرے مرشد خانہ تے پڑھیاں جاندیاں نیں۔ میرے مرشد کریم میری اوس پہلی کھٹی نوں ویکھ کے بہوں راضی ہوئے۔ جتھے اوہناں مینوں ڈھیر دعاواں نال نوازیاں اوتھے نال ای حوصلہ افزائی دے طور تے آکھن لگے کہ ہک ہور کتاب ہونی چاہیدی اے جہیڑی پہلی توں وی ودھ ہووے۔مرشداں دے حکم ہوون دی ڈھل ہائی کہ ٹھیک اِک مہینے دے وچ ایہہ نعتاں دا دیوان مکمل ہو گیا۔ میرا ایس وچ کوئی کمال نہیں اے۔ میں ایس نعتاں دے دیوان نوں اپنے مرشد کریم دی کرامت سمجھداں۔ اللہ پاک نے وی انج خاص رحمتاں نچھاور کیتیاں کہ ایس نعتیہ دیوان دی ہر نعت شریف توں پہلاں دو نفل نماز ادا کیتی تے پھر لکھی گئی اے۔ میں اپنے ماں باپ دا دل دیاں ات ڈونگیاں توں شکر گزار آں جہناں دیاں دعاواں تے ہر قسم دا تعاون ہر ویلے میرے نال رہندا اے، اللہ سوہنا میرے ماں باپ نوں صحت تندرستی آلی لمبی حیاتی بخشے۔
اللہ پاک دا لکھ لکھ شکر اے کہ اوس کریم ذات نیں محمد عربی ﷺ دا اُمتی بنایا، پھر اجہے مرشداں دی نسبت نال نوازیا جہناں دی ولی گر نگاہ سانوں سدھے راہ تے ٹرن دے قابل بنایا۔ کرم تے کرم ایہہ کہ مینوں ’’نعت دے دیوے‘‘ روشناون مگروں ’’نعت دا چانن‘‘ کھلارن دی توفیق عطا فرمائی۔
میں اُچیچ نال مان جوگ محترم جناب پروفیسر احسان اللہ طاہر صاحب دا دلوں مشکورتے ممنون آں جہناں ایس نعتیہ دیوان تے تنقیدی، تحقیقی تے تعارفی دیباچہ لکھ کے میرا مان ودھایا، نال ای اپنے محسن جناب پروفیسر ریاض قادری صاحب نوں وی سلام پیش کرنا جہناں ایس دیوان نوں چھاپن لئی ساڈی ہر حوالے نال رہنمائی کیتی تے بھرواں مضمون لکھ کے اپنیاں محبتاں ساڈے نال سانجھیاں کیتیاں۔
میں اوہناں سارے بیلیاں دا ذکر وی ضروری سمجھداں جہناں کسے وی رنگ نال ایس سوہنی تے سنکھی کوشش وچ ہتھ ونڈایا، جہناں وچ خاص کر میرے پنڈ دی صوفی برکت آلی مسیت دی کمیٹی دے سارے ممبرتے استاد رائے ظفر ہارون صاحب، استاد رائے خان بہادر صاحب، استاد غلام مصطفی آزاد نقیبی صاحب، استاد منور شکیل صاحب، استاد حکیم افضل مراد صاحب، بابا نور محمد سیفی صاحب، رائے امجد ہارون صاحب (وارڈن انسپکٹر)، شہزادہ تبسم یار صاحب، عدنان ناصر صاحب، حافظ منظور صاحب، رائے ناصر جمیل صاحب، رائے محمد سلیم سیفی صاحب، قاری محمد رمضان سیفی صاحب، حضرت علامہ جنید رضا سیفی صاحب،محمد آصف رضاسیفی صاحب، محمد ناصر اقبال پاندھا صاحب، دے ناں قابل ذکر نیں۔
اخیر تے اپنے شاگرد مستنصر حسین شوق دا دلوں مشکور آں جہندا ہر حوالے نال تعاون شامل حال رہیا۔ میں دعا کرنا کہ سوہنے محمد عربیﷺ دا سوہنا رب ایہناں سارے بیلیاں دی حیاتی وچ سکھاں دا دیوا بالی رکھے۔ آمین۔
اَللّٰھُمّ ثبتنا علی مدح النبی الکریم علیہ التحیتہ والتسلیم۔
محسن اعجاز سیفی
0345-5085794
