کونین نیں غلام تے آقا نبی کریم

کونین نیں غلام تے آقا نبی کریم
ہاں ہاں ، خدا کریم دا جلوہ نبی کریم

مکھ دے نگر ایہ نین کدوں دوویں غار نیں
نِت کہن اک تے پائو آ پھیرا نبی کریم

ناں بھُل تبوک ، بدر تے یمامہ نوں یاد رکھ
ساڈا وی اوہی جذبہ تے اوہا نبی کریم

کر ناں وچول کر نہ اے جگ وچولیا
میں آں نبی کریم دا تے میرا نبی کریم

سجدہ خدا دی ذات نوں تے کعبے دے ولے منہ
دل مست ہے تے مست دا کعبہ نبی کریم

مومن کرے جے سجدہ تے معراج آکھسیں
کی آکھسیں کریندے جو سجدہ نبی کریم

اے دل تڑف کے آپ دے قدماں تے جا پویں
اعجاز کی اے حال جے پچھیا نبی کریم