کوئی بھی سہولت ہو سہولت سے نہیں آئی

کوئی بھی سہولت ہو سہولت سے نہیں آئی
ہم تک تو محبت بھی محبت سے نہیں آئی
شاید نہ ہو، ممکن ہے کہ ہو جائے محبت
یہ رسم کسی کی بھی اجازت سے نہیں آئی
ہم نے تو کبھی سودوزیاں کا نہیں سوچا
یہ پیار کی دولت ہے تجارت سے نہیں آئی
اجداد کا ورثہ ہے فراوانیٔ تہذیب
مجھ تک یہ کسی مالِ غنیمت سے نہیں آئی
کچھ غم نہیں رسوائی کا اس بات کا دکھ ہے
رسوائی بھی آئی ہے تو عزت سے نہیں آئی
رات آئی تھی سونے کا ارادہ بھی کیا تھا
پر نیند ترے خواب کی حرمت سے نہیں آئی
۔۔۔۔۔۔۔۔۔۔۔۔۔۔۔۔۔۔۔۔۔