تعارف نگار :ریحانہ احمد
پیغمبروں کی سر زمین(سفر نامہ) یعقوب نظامی
انگلینڈ میں مقیم یعقوب نظامی بنیادی طور پر صحافت سے تعلق رکھتے ہیں لیکن ادبی سوجھ بوجھ رکھتے ہیں۔بلکہ یہاں مغربی ممالک میں مقیم بہت سے نمبر دو قسم کے شاعروں اور ادیبوں سے کہیں زیادہ ادبی شعور رکھتے ہیں۔ ان کی زیر نظر کتاب ان کے اس سفر کی یادوں پر مشتمل ہے جو انہوں نے بلاد عریبیہ میں کئے تھے۔ان ممالک میں شام،عراق،اسرائیل، فلسطین اور اردن شامل ہیں۔یعقوب نظامی کا اندازِ بیان دلچسپ ہے ۔اس سفر کے دوران ان کو جو کچھ پیش آیا اور جو کچھ ان کے محسوسات تھے انہوں نے اس سب کو سلیقے کے ساتھ بیان کیا ہے۔۲۹۶صفحات کی اس کتاب کو ادارہ نگارشات لاہور نے اہتمام کے ساتھ شائع کیا ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
دیکھ دھنک پھیل گئی(نظمیں) وزیر آغا
نئی اردو نظم کے معتبرشاعروں میں وزیر آغا ایک اہم نام ہیں۔ان کی نظموں کا تازہ مجموعہ’’دیکھ دھنک پھیل گئی‘‘ ہے۔اس میں ۳۵نظمیں شامل ہیں۔وزیر آغا کی نظموں کے پہلے مجموعوں کو سامنے رکھ کر اس مجموعے کی نظموں کی قدرو قیمت کا ندازہ کیا جا سکتا ہے ۔جدید نظم سے دلچسپی رکھنے والے قارئین اس مجموعہ میں گہری دلچسپی لیں گے۔
انتساب ’’فاختہ کے نام‘‘ کیا گیا ہے جس سے اندازہ کیا جا سکتا ہے کہ اس وقت عالمی امن کو جو خطرات لاحق ہیں،وہ ان کے لئے کتنی تشویش رکھتے ہیں۔نظم’’کبھی آسماں ایک صحرا تھا‘‘ان کی اسی تشویش کے اظہار اور دکھ کے بیان کی کیفیات کی ایک نمائندہ مثال ہے۔۸۰صفحات پر مشتمل نظموں کا یہ مجموعہ سادگی اور سلیقے کے ساتھ ادارہ کاغذی پیرہن لاہور نے شائع کیا ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
نئے موسموں کا پہلا دن(شعری مجموعہ) شاعر:سعید روشن
سعید روشن راجستھان (انڈیا) کے رہنے والے ہیں۔اب کویت میں مقیم ہیں ۔ ’’نئے موسموں کا پہلا دن‘‘ ا ن کاپہلا شعری مجموعہ ہے جو سعد پبلی کیشنز لاہور سے شائع ہوا ہے۔کتاب کا پیش لفظ ڈاکٹر شاہد میر نے لکھا ہے۔پہلا
مجموعہ ہونے کے حوالے سے اس میں ان امکانات کو دیکھا جا سکتا ہے جو ان کے آنے والے مجموعوں میں ملیں گے۔یہ مجموعہ ایک ایک حمد اور نعت،۹نظموں اور۸۰غزلیات پر مشتمل ہے اور اس سے سعید روشن کی شعری صلاحیتوں کے تیور اور انداز سامنے آتے ہیں۔ امید ہے سعید روشن کے آنے والے شعری مجموعے ان کی شعری پیش رفت اور پیش قدمی کے غماز ہوں گے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
غالبیات پر تین یاد گار تقریریں مرتب:سنجئے گوڑ بولی
۹۔۱۰؍اگست ۱۹۹۷ء کو پونہ میں غالب سیمینار ہوا تھا۔اس میں غالب پر متعدد مقالات پڑھے گئے۔تقاریر کی گئیں۔سنجئے گوڑ بولے نے اس سیمینار کی تین تقریروں کو منتخب کیا ہے اور انہیں کتابی صورت میں محفوظ کر دیا ہے۔
علی سردار جعفری(’’بنارس سے متعلق غالب کا نظریہ چراغِ دیر کی روشنی میں‘‘)،کالی داس گپتا رضا(’’چراغِ دیر میں بنارس کا بیان‘‘)اور ڈاکٹر خلیق انجم(’’غالب کے خطوط اور ان کی ادبی اہمیت‘‘) کی یہ تقاریرآڈیو کیسٹ سے تحریری صورت میں محفوظ کی گئی ہیں۔غالبیات کے حوالے سے ان تقاریر کی ایک اہمیت بنتی ہے۔۷۶صفحات کی یہ کتاب اسباق پبلی کیشنز پونہ نے اہتمام کے ساتھ شائع کی ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
اندھا کنواں(ڈرامے) مصنف: رشید نیروا
ماریشس میں اردو زبان کو تھوڑی بہت سرکاری سرپرستی حاصل ہے اس لئے وہاں اردو کے بہی خواہوں کے لئے اردو کے فروغ کے لئے کام کرنے میں کچھ آسانیاں ہو جاتی ہیں۔درسگاہوں میں اردو کی تدریس کے ساتھ ادبی طور پر اردو سے دلچسپی قائم رکھنے کے لئے وقتاَ فوقتاَ تقریبات کا اہتمام کیا جاتا ہے۔ ادبی کانفرنسوں اور مشاعروں کے علاوہ تقریب کی ایک صورت اسٹیج ڈرامہ بھی ہے۔اس سلسلہ میں رشید نیروا وہاں کے ڈرامہ نگار کے طور پر خاصے نمایاں ہیں۔ان کے تحریر کردہ متعددڈرامے وہاں اسٹیج کئے جا چکے ہیں۔ ان میں سے پندرہ ڈراموں کو انہوں نے کتابی صورت میں ترتیب دیا ہے۔یہ سارے ڈرامے یک بابی ہیں۔ رشید نیروا اردو میں مقامی زبان کے بعض الفاظ کی آمیزش سے خود کو اپنے ناظرین کے بہت قریب کر لیتے ہیں۔ ۲۶۴صفحات کی یہ خوبصورت کتاب ذی نیشنل اردو انسٹی ٹیوٹ موریشس نے بہت اچھے طریقے سے شائع کی ہے ۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
باغوں میں بہار آئی(ماہیے کا انتخاب) مرتب: ارشد اقبال آرشؔ
ارشد اقبال آرشؔ اٹلی میں مقیم ہیں اور اپنی ہمت کے مطابق اردو کی خدمت میں لگے رہتے ہیں۔زیر نظر کتاب ان کا ترتیب دیا ہوا ماہیے کا انتخاب ہے۔اس میں ۱۰۳ماہیا نگاروں کے ماہیے شامل کئے گئے ہیں۔ہر ماہیا نگار کا تعارف بھی ساتھ دیا گیا ہے۔ارشد اقبال آرش نے بلاشبہ اسے مرتب کرنے میں بہت محنت کی ہے لیکن کتابت کی اتنی زیادہ غلطیاں ہیں کہ کتاب اتنی اہم ہونے کے باوجود اپنا وہ تاثر قائم نہیں کرپاتی جو حقیقتاََ قائم ہونا چاہئے تھا۔اگر پروف ریڈنگ میں احتیاط کی جاتی تو اس انتخاب کا تاثر بہت زیادہ بنتا۔۱۹۸صفحات کی اس کتاب کو عالمی تحریک فروغ ادب و ثقافت اٹلی نے اچھے گیٹ اپ کے ساتھ شائع کیا ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
یادوں کی بارش(ماہیے) ماہیا نگار:ناصرنظامی
ہالینڈ میں قیام پذیرناصر نظامی اردو ماہیا نگاروں میں خصوصی اہمیت کے حامل ہیں۔ان کے ماہیوں کا مجموعہ ’’یادوں کی بارش‘‘اردو ماہیے کی نظم و نثر میں اب تک کا سب سے ضخیم مجموعہ ہے۔۵۲۸صفحات پر مشتمل ’’یادوں کی بارش‘‘ حقیقتاَ اردو ماہیے کی موسلا دھار بارش ہے۔ناصر نظامی نے ہر طرح کے اور تقریباَ ہر موضوع پر ماہیے لکھے ہیں اور بے تحاشہ لکھے ہیں۔ان کی ایک کوبی یہ ہے کہ وہ گیت نگاری کرتے ہیں ۔ان کے گیتوں کی آڈیو کیسٹس اور سی ڈی بھی جاری ہو چکی ہیں۔اسی لئے ان کے ماہیے کسی عروضی گھیرے سے زیادہ ماہیے کی لَے کی پابندی کرتے ہیں۔
ماہیوں کا یہ ضخیم اور خوبصورت مجموعہ نظامیہ آرٹ اکیڈمی ایمسٹرڈیم ہالینڈ کے زیر اہتمام شائع کیا گیا ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ذرا انتظار کر(غزلیں) شاعر:فراغ روہوی
فراغ روہوی مغربی بنگال میں مقیم اردو کے معروف شاعر ہیں۔ان کے ماہیوں کا مجموعہ’’چھیاں چھیاں‘‘ شائع ہو چکا ہے۔ کلکتہ سے ’ ’ترکش‘‘ کے نام سے ایک ادبی رسالہ بھی جاری کر رکھا ہے۔اب ان کی غزلوں کا مجموعہ منظرِ عام پر آیا ہے۔اس میں ایک حمد،ایک نعت اور ایک دعائیہ’’حرفِ دعا‘‘اور ۱۰۸غزلیں شامل ہیں۔ویسے حمد،نعت اور دعائیہ کا لہجہ بھی غزلیہ ہے۔سید حسن نے ’’صاحبِ کتاب‘‘ کے عنوان سے فراغ روہوی کا انوکھے انداز میں تعارف کرایا ہے۔’’ذرا انتظار کر‘‘کی غزلیں فراغ روہوی کی غزل کے انداز کو مناسب طور پراجاگر کرتی ہیں۔۱۶۰صفحات کی اس کتاب کو گلستاں پبلی کیشنز کلکتہ نے خوبصورت طریقے سے شائع کیا ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
ایک شام کا قصہ(افسانے) مصنف: سلطان جمیل نسیم
بیک وقت کراچی اور کینیڈا میں مقیم سلطان جمیل نسیم اردو کے معروف اور ممتاز افسانہ نگار ہیں۔’’ایک شام کا قصہ‘‘ان کے 14 افسانوں پر مشتمل ہے۔ان افسانوں کی ایک اہم خصوصیت یہ ہے کہ یہ سب کراچی اور حیدرآباد کے فسادات کے پس منظر میں لکھے گئے ہیں۔اس سلسلے میں سلطان جمیل نسیم لکھتے ہیں:
’’وہ عرصہ جو ’’ایک شام کا قصہ ‘‘ کے افسانوں میں سمٹا ہوا ہے وطنِ عزیز کے میرے دو شہروں ،کراچی اور حیدرآباد کے لئے بالخصوص اور میرے صوبے سندھ کے لئے بالعموم کرب اور ابتلا کا عرصہ تھا۔دہشت گردی حکومت کی جانب سے ہو،سیاسی جماعتوں، مذہبی تنظیموں،لسانی گروہوں یا علاقائی تحریکوں کی طرف سے، اس کا اجتماعی اثر پوری قوم اور ملک پر ہوتا ہے۔‘‘
اس زاویے سے سلطان جمیل نسیم کا یہ افسانوی مجموعہ ایک خاص اہمیت کا حامل ہے۔
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
