قسمت چنگی جو ناہی رُٹڑے نصیب ہاسے تی اِتنے دور گئے آں جتنے قریب ہاسے
بس جیونٹراں جو ماہی مر مر کے جیندے پئے آں چپ کر پَھٹ جگر دے ہتھاں نال سیندے پئے آں
کینوں زخم جا دکھاندے ہر کوئی رقیب ہاسے تی اِتنے دور گئے آں جتنے قریب ہاسے
اُوندے سامنڑیں شاہاں دے شاہ ہا نہ راج آہن اَساں دل جلاں دے سر تے غربت دے تاج آہن
او ہو ذر دا ہا پجاری اساں بہوں عزیب ہاسے تی اِتنے دور گئے آں جتنے قریب ہاسے
سنگ دل کوں سنگ رلا کے اود ھے ملنگ تے ہوسے رنگ اُڈ گے رنگیلے رنگوں بے رنگ تے ہوسے
میٹھے زہر دے کے ٹُر گئے جہڑے طبیب ہاسے تی اِتنے دور گئے آں جتنے قریب ہاسے
پتھر دے نال شیشہ ٹکرا کے بُھل گیو سے شیدائی تے دیوانے دنیا تے ہُل گیو سے
اے بے وفا صنم تیکوں سمجھا حبیب ہاسے تی اِتنے دور گئے آں جتنے قریب ہاسے
سر رکھ کے زانواں تے قسمت کوں روندے راہسوں ہنجو نال زندگی دے زخماں کوں دھوندے راہسوں
سودے بیوسؔ دلاں دے کیتے عجیب ہاسے تِھی اِتنے دور گئے آں جتنے قریب ہاسے
