(Last Updated On: )
کس بات پہ کہتے ہو کہ تقدیر بدل دی
زنداں ہے وہی ، پاؤں کی زنجیر بدل دی
میدان میں ہارا ہوں تو اب مجھ پہ کھلا ہے
کس حاشیہ بردار نے شمشیر بدل دی
پہلے تو ہر اک بات سے ہوتا گیا منکر
پھر اس نے مرے سامنے تحریر بدل دی
ترتیب نئی حفظ ِ مراتب کی بنا کر
بے نام نے فہرست ِمشاہیر بدل دی
کمرے کی اداسی تو بدلنے سے رہا میں
دیوار پہ لٹکی ہوئی تصویر بدل دی
ملزم کو بہر حال بنانا تھا جو مجرم
منصف نے شواہد نہیں ، تعزیر بدل دی
نجمیؔ میں کچھ ایسے بھی تجربات سے گذرا
لہجے نے مرے شعر کی تاثیر بدل دی
۔۔۔۔۔۔۔۔۔۔۔۔۔۔۔۔۔۔۔۔
