خضر کی موت بالکنی سے گرنے پر ہوئی جس میں کسی جن کا ہاتھ نہیں تھا. لیکن سزا کے طور پر اشتخ شدوس کی بیوی زلزلالہ کو تمبورا آتش فشاں میں ڈالا جا چکا ہے. غضنفر کی واپسی پر جلال شاہ نے دونوں کو تفصیل بتانی شروع کی.
میں اور غضنفر جس جہت میں داخل ہوئے تھے وہ اسی دنیا میں جنات کی پنچائیت ہے جہاں تمام جنات کو بلا کر مقدمے کی سماعت ہوئی. غضنفر کا بچہ زلزلالہ نے ضائع کیا. یہ الزام بھی ثابت ہونے پر اس خبیث بدروح کو تمبورا بھیج دیا گیا ہے. لیکن غضنفر کو اپنے اس عظیم گناہ پر توبہ کرنے کی ضرورت ہے جس کا ارتکاب اس نے اپنی بھتیجی کی جائیداد ضبط کرتے ہوئے کیا. توبہ کا معنی ہے پلٹنا اور رجوع کرنا.
غضنفر ….. توبہ کا مطلب زبانی معافی نہیں بلکہ گناہ کا ازالہ ہے اور تم نے جس آگ میں ہاتھ ڈالا ہے, جلنے سے پہلے باہر نکال دو. اپنی بھتیجی کی پرورش کرو اور اس کی رقم اس کے حوالے کرو اس وقت جب وہ بالغ ہو جائے ورنہ اس لم ڈھینگ کی بات ذہن نشین کر لو جو اس نے تم سے صحرا میں کی تھی.
خیام ……. یہ گھر تم سے پہلے ان حشرات کا بھی ہے جو یہاں لاکھوں برس سے مقیم ہیں. تم سے پہلے اس گھر پر ان درختوں کا بھی حق ہے جو یہاں دہائیوں سے ایستادہ ہیں. تم نے یہاں گھومنے والے سانپ کو جان سے مار دیا جو یقیناً خوف کے باعث تمہارا فطری ردعمل تھا. تمہارے اس عمل کی پکڑ اس لیے نہیں کی گئی کیونکہ یہ قتل سہواً کیا گیا. اشتخ شدوس اور تمام جنات کو قلعہ ڈوور بھیج دیا گیا ہے اور وہ اب اس گھر یا کسی انسان کے بدن میں نہیں ہیں.
خیام تم اور تمہاری بیوی نمازوں میں کوتاہی برتتے ہو. تم خاص طور پر طہارت کا خیال نہیں رکھتے. یاد رکھو طہارت ایمان کا نصف ہے اور ایک مسلمان گندگی کو پسند نہیں کر سکتا. الطہور شطر الایمان اور النظافۃ من الایمان.
غضنفر یہ کھجور لو. اسے آدھا تم کھاؤ اور آدھا اپنی بیوی کو کھلاؤ. اللہ رسول کی مدد شامل حال رہے. ان شاءاللہ اولاد عطا ہو گی مگر توبہ کے بعد.
ماہین کو اٹھا کر لاؤ تاکہ میں اپنی بیٹی کے سر پر ہاتھ پھیروں. غضنفر ماہین کو اٹھا لایا جو جلال شاہ کو خاموشی سے دیکھ رہی تھی.
جلال شاہ نے ماہین کے چہرے اور سر پر ہاتھ پھیرا اور اس کے ماتھے پر پیار کیا. ان شاءاللہ یہ بیٹی ماں باپ کا اقبال بلند کرے گی. ان شاءاللہ یہ بیٹی گزرے واقعات کے سحر سے آزاد ہو گی. ان شاءاللہ یہ بیٹی فصیح اللسان ہو گی.
خیام ……. جلال شاہ مخاطب ہوئے. کل گھر والوں کو بلا خوف و خطر یہاں لے آؤ مگر میری باتوں پر عمل ضرور کرنا. کل خضر کا جنازہ پڑھوا کر اسے قریبی قبرستان میں دفن کرنا اور اس کے گھر والوں کو اس کی وفات کی وجہ بتانا. وہ لوگ شاید تم پر اس کے قتل کا مقدمہ درج کریں لیکن تم اس مقدمے سے باعزت بری ہو جاؤ گے. خضر کی بیوہ کو اپنی بہن بنا کر اس کے بچوں کی کفالت کرنا. کوشش کرنا کہ اس کا کسی اچھی جگہ بیاہ ہو جائے.
خیام ….. والدین اگر کمزور ہوں, بیمار ہوں, پھر بھی گھروں میں برکت کا باعث ہوتے ہیں. ان کا وجود گھروں پر نور برسنے کا سبب بنتا ہے. اپنے ماں باپ کو خود سے الگ مت کرنا. انہیں اپنے ساتھ رکھنا اور ان کی خدمت کرنا. والدین کی دعا ہر آفت کا راستہ روکتی ہے. والدین کی دعا بچوں پر اللہ کی رحمت برساتی ہے. والدین کی قدر کرو خیام. ان کا کمزور وجود اللہ کے ہاں بڑی طاقت رکھتا ہے.
فجر کی اذان ہو رہی تھی. ماہین جلال شاہ کی باہوں میں سو چکی تھی. اسے بستر پر لٹا کر خیام اور غضنفر نے وضو کیا. منان بھی اس دوران گھر کے اندر آ چکا تھا. تینوں نے جلال شاہ کی امامت میں فجر کی نماز ادا کی.
شاہ جی آپ رک جائیں اور میرے گھر والوں اور صائمہ سے بھی مل لیں. خیام بولا
خیام …… میں کسی اور سے نہیں ملوں گا, واپس جاؤں گا. لیکن جاتے ہوئے تمہیں یہ بات ضرور بتا دوں کہ میں غضنفر کو کیوں مل گیا حالانکہ مجھے ڈھونڈنا آسان کام نہیں ہے ……. وہ عورت, جو تمہیں کراچی آتے وقت ریلوے سٹیشن پر ملی تھی خیام …. وہ عورت جسے تم نے پانچ ہزار روپے دئیے تھے.
خیام سوچنے لگا …… جی جی یاد آیا, وہ عورت جس کی باہوں میں ایک بچہ تھا.
ہاں, وہ عورت …… وہ بہت گنہگار تھی خیام. اس کے گناہ پہاڑوں سے بلند تھے. مگر وہ توبہ کر چکی تھی. سچی توبہ. وہ جسم فروش تھی مگر یہ گناہ ترک کر کے فاقوں تک پہنچ چکی تھی. تم نے اسے پانچ ہزار روپے دئیے تھے غیر ارادی طور پر ….. اس کی باہوں میں جو بچہ تم نے دیکھا تھا وہ مر چکا تھا. وہ عورت تمہارے دئیے پیسے کو مٹھی میں دبا کر روئی تھی. اس نے تمہاری دی ہوئی رقم سے بچے کے کفن دفن کا بندوبست کیا تھا. وہ عورت مر چکی ہے خیام. میں اس کی اس دعا کا اجر ہوں جو اس نے تمہاری دی رقم لیتے وقت تمہیں دی تھی. خیام ….. معلوم ہے اس نے تمہیں کیا دعا دی تھی? جلال شاہ نے خیام سے پوچھا
نہیں مرشد ..,… نہیں معلوم. خیام کے عارض اب آنسوؤں سے تر ہو چکے تھے.
جلال شاہ نے خیام کے کاندھے پر ہاتھ رکھ کر کہا. اس نے تمہیں دعا دی تھی خیام ……..
“اللہ تیری مشکلیں آسان کرے”
(ختم شد)
تنوع کے فقدان کا عذاب
لاہور ایئرپورٹ سے فلائی کرنے والا ہوموپاکیئن دو تین گھنٹے بعد دوبئی یا دوحہ میں اترتا ہے تو ایک مختلف...