خاور اعجاز(ملتان)
گزشتہ دن میں جو ضم ہو گیا ہے اِک دن اور
مِری حیات سے کم ہو گیا ہے اِک دن اور
ہمیں تو جینے کی اُمیّد مارے جاتی ہے
قضا سے ہم کو بہم ہو گیا ہے اِک دن اور
مِرا وجود میں آنا ابھی موخر ہے
کہ صرفِ سیرِ عدم ہو گیا ہے اِک دن اور
لو ہم پہ آ گئی اِک اور شب گدائی کی
کہ نذرِ اہلِ کرم ہو گیا ہے اِک دن اور
اِک اور دِن پہ رکھا اُس نے مہربانی کو
اور اِس طرح سے اَہم ہو گیا ہے اِک دن اور
۔۔۔۔۔۔۔۔۔۔۔۔۔۔۔۔۔۔۔۔۔۔۔
شبِ وصال کے پیمان میں چمکتا ہُوں
پھر ایک ہجر کے عرفان میں چمکتا ہُوں
مِرے لیے کوئی ساعت بھی اِنتہائی نہیں
اِک آن بجھتا ہُوں اِک آن میں چمکتا ہُوں
مَیں کوئی شے نہیں ، اِک قیمتی اثاثہ ہُوں
اور اُسکے بختِ خُوش اِمکان میں چمکتا ہُوں
اُبھر رہا ہے کہیں سے ستارہ ء اُمید
کہ مَیں ہی شب کے بیابان میں چمکتا ہُوں
گزر رہا ہُوں کسی تیرہ تر زمانے سے
مگر یہ دیکھ تِرے دھیان میں چمکتا ہُوں
۔۔۔۔۔۔۔۔۔۔۔۔۔۔۔۔۔۔۔۔۔۔
کِسی بھی سمت میں عزمِ سفر ہونے نہیں دیتا
اور اپنے آپ میں بھی تو بسر ہونے نہیں دیتا
بدلتا ہے جہانِ شوق لیکن میری مرضی سے
اِدھر کا ایک ذرّہ بھی اُدھر ہونے نہیں دیتا
عجب اِک دُھند میں رکھّا ہُوا ہے منظرِ ہستی
ہمیں اندازہ ء شام و سحر ہونے نہیں دیتا
کہیں تو دُور کرتا جا رہا ہے راہ کے پتھّر
کہیں دِیوار میں کوئی بھی دَر ہونے نہیں دیتا
ہمارے ہونے سے ہی کام چلتے ہیں سبھی اُس کے
ہمیں ہی وُہ مگر اِس کی خبر ہونے نہیں دیتا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
یہ دِل کی بات ہے ، دُنیا نہ دِیں پہ ٹھہرے گی
نِکل گئی تو بھلا پھِر کہیں پہ ٹھہرے گی !
اُڑی پھِرے کِسی باغِ بہشت میں لیکن
جہاں کی خاک ہے آخر وہیں پہ ٹھہرے گی
کِسی دریچے ، کِسی بام و در سے ہو آئے
مگر نِگاہ اُسی مہ جبیں پہ ٹھہرے گی
پڑاؤ کرتی ہُوئی جا رہی ہے ساعتِ وصل
سو آسمان سے پہلے زمیں پہ ٹھہرے گی
دھڑک رہی ہے جو اِک قریہ ء اجل کے قریں
تو زِندگانی بالآخر یہیں پہ ٹھہرے گی
وہ خواب رُت کہ جو منڈلا رہی ہے آنکھوں پر
گمان ہے کہ نِگاہِ یقیں پہ ٹھہرے گی
۔۔۔۔۔۔۔۔۔۔۔۔۔۔۔۔۔۔۔۔۔۔
کبھی سفر میں ہمارے قدم اکٹھے تھے
خوشا جوانی ! کہ تُو اور ہم اکٹھے تھے
صریر قلب نہ قرطاسِ جاں سلامت اَب
وہ دِن گئے کہ یہ لوح و قلم اکٹھے تھے
رہا نہ شوق کا رہوار اپنے قابو میں
شبِ وصال میں کچھ زیر و بم اکٹھے تھے
مِرے وجود نے تجھ سے جدا کیا مجھ کو
وہ دِن بھی تھے کہ وجود و عدم اکٹھے تھے
ہمیں شمار کیا ایک دن الگ اُس نے
سو بٹ گئے وہ جو رنج و الم اکٹھے تھے
