خاور اعجاز(ملتان)
بات جب ہے کہ کوئی بات بنانی آ جائے
ایک ہی ذرّے میں صحرا کی کہانی آ جائے
آئنہ خانے میں چلتے ہیں دِیا لے کر ہم
دیکھتے ہیں جو نظر عہدِ جوانی آ جائے
ساتھ مِل جائے جو اِک بچھڑی ہُوئی لہر کبھی
میرے دریائے تحّیر میں روانی آ جائے
لِکھتے لِکھتے مجھے اِک عرصہ گزر جائے مگر
اُس کا اِظہار جب آئے تو زبانی آ جائے
ہو بھی سکتا ہے عصا ٹیکتی رَستے میں کہیں
وہی بچھڑی ہُوئی اِک شکل پُرانی آ جائے
۔۔۔۔۔۔۔۔۔۔۔۔۔۔
کوئی مہلت نہ دِی دریا کی سِتم رانی نے
مجھ کو بھی کھینچ لِیا بہتے ہُوئے پانی نے
ڈُھونڈتا تھا مَیں گئے وقت کے کُچھ عکس مگر
مجھے گم کر دِیا آئینے کی حیرانی نے
مَیں جہاں بھی رہا تنہا نہیں رکھّا مُجھ کو
خُود سے لِپٹا لِیا اُس شہر کی وِیرانی نے
کب ہُوئے میرے ، در و بامِ زمانہ تیرے
بے گھری ہی مجھے دِی گھر کی نگہبانی نے
ایک سِکہّ بھی مِرے نام کا چل پایا نہیں
مجھ کو رُسوا کِیا اِک روز کی سُلطانی نے
۔۔۔۔۔۔۔۔۔۔۔۔۔۔
زمینِ خواب پہ اِک نقش سا بناتا ہُوا
گزر گیا ہے وُہ دریا مجھے بُلاتا ہُوا
پڑی ہُوئی ہے مِرے دِل میں کس جہاں کی راکھ
کُریدتا ہے جسے وقت آتا جاتا ہُوا
مِرے جلو میں دُھواں ہی نہیں چراغوں کا
جلوسِ برگ بھی ہے تالِیاں بجاتا ہُوا
ہوائے تیز میں اِک نخلِ خشک بیٹھ گیا
گذشتہ عہد کے رنج و الم اُٹھاتا ہُوا
رُکے ہُوئے نہیں ہم بھی بفیضِ سیلِ جنوں
گزر رہا ہے زمانہ بھی ڈگمگاتا ہُوا
۔۔۔۔۔۔۔۔۔۔۔۔۔۔۔
قریہ ء انجم و مہتاب سے آگے کیا ہے
خواب ہی خواب ہے توخواب سے آگے کیا ہے
نیم روشن سا ہے اطراف کا سارا منظر
بابِ عرفاں تِری محراب سے آگے کیا ہے
بے سبب تو نہیں یہ نقلِ مکانی کا سماں
دوستو عالمِ اسباب سے آگے کیا ہے
اے زمانے مِری دھڑکن میں سما جا تُو بھی
اِس جہانِ دلِ بیتاب سے آگے کیا ہے
کِس لیے بھاگتی ہے وحشتِ صحرا آگے
میرے اِس دیدہ ء پُر آب سے آگے کیا ہے
