(Last Updated On: )
کدی تے نعت دی اے عشق آ کے تے سکھا جاچ
قلم حسّان دا مینوں پھڑا کے تے سکھا جاچ
دَسا اے تھم!کیویں لجپال تینوں سینے لایا
توں رویوں کنج مینوں وی روا کے تے سکھا جاچ
کیویں اے کعب آقا توں عطا ہوئی اے چادر
بھلا ہوئی عطا کیویں سنا کے تے سکھا جاچ
دلا! کیویں توں پل وچ جا مدینے دل وچھوندا
کدی تے نال مینوں وی رلا کے تے سکھا جاچ
نبی توں گھر لٹاون دی نصیحت نت سنیندی
کدی تے واعظا! توں وی لٹا کے تے سکھا جاچ
بھلا سرکار میں کیویں مکاواں ’’میں‘‘ دا رولا
ہزاراں اکھ تے پردے نیں ہٹا کے تے سکھا جاچ
بھلا سعدی عطا ہوندا کدوں اعجازؔ مصرع
کوئی گُر نعت لکھنے دا سکھا کے تے سکھا جاچ
