(Last Updated On: )
جو خواب بنتا نہیں تھا وہی بناتی تھی
میں دل حویلی میں کتنے دئیے جلاتی تھی
کسی بہانے ترا گھر تو سامنے آئے
گلوب سامنے رکھ کر یونہی گھماتی تھی
وہ ایک تو تھا جو آتا نہیں تھا کہہ کر بھی
جو میں نے وعدہ کیا ہو، اسے نبھاتی تھی
یہ حادثہ تو مِری زندگی کا روگ ہوا
اگرچہ تم سے ملاقات حادثاتی تھی
مجھے وہ دیکھتا اور راستے سے ہٹ جاتا
اگرچہ اُس کے لئے اُس گلی میں جاتی تھی
مجھے وہ روز بتاتا تھا میں یہاں ہوں سنو
جسے میں روز کہیں رکھ کے بھول جاتی تھی
چمن کے لوگ بتاتے ہیں روز شام ڈھلے
تمہارے ساتھ کوئی جل پری بھی آتی تھی
۔۔۔۔۔۔۔۔۔۔۔۔۔۔۔۔۔۔۔۔۔۔۔
