(Last Updated On: )
جو کہوے مصطفی دی شریعت غلط
معرفت اوہ طریقت ، حقیقت غلط
آ گنہگار بخشش کرا آپ توں
کون کہندا کہ ہے میری دعوت غلط
مصطفی دے دوارے توں جھکدی منے
اوہ عدالت غلط ، اوہ حکومت غلط
جے نبی دے صحابہ نوں آکھیں غلط
اصل وچ آکھناں ایں نبوت غلط
نعت لکھ پر شریعت ، طریقت نوں سکھ
ناں کریں ایویں ساری عبادت غلط
نعت لکھناں منیسیں کدی سوہنیا
ساہ اک ناں لواں ہووے نیت غلط
نور اکھ دے کی اعجازؔ نوں ویکھناں
نور دل دا جے نئیں تے زیارت غلط