جلال شاہ نے قرآن پاک بند کر کے سینے سے لگا لیا اور سورۃ الجن پڑھنا شروع کر دی. جلال شاہ کی آواز میں کمال تاثیر تھی جو یقیناً بیس سالہ ریاضت کی گواہی دے رہی تھی. جلال شاہ نے بیس برس تک کوئی نماز حتیٰ کہ نماز تہجد بھی قضا نہیں کی تھی. جلال شاہ کا ذریعہ معاش کتابت تھا جس سے ان کی گزر بسر ہوتی تھی. اکل حلال نے شاہ جی کا چہرہ بارعب اور نمازوں کی کثرت نے ماتھا پرنور بنا دیا تھا. ایمان اپنی تابانیوں کے ساتھ اسی دل میں جلوہ افروز ہوتا ہے جو کثافت سے پاک کیا گیا ہو. حسد, بغض, کینہ, عداوت, نفرت, تعصب جس دل سے نکل جائیں اور اللہ کی کائنات سے محبت جہاں گھر کر لے وہ دل ناقابل شکست ہو جاتا ہے. جہاں اللہ کا خوف ہو وہاں ہر خوف قابو میں رہتا ہے. جہاں اللہ اور اس کے رسول کی اطاعت ہو وہاں پوری کائنات مطیع بن جاتی ہے. جلال شاہ خوبصورت لحن سے فضا مسحور بنا رہے تھے اور ہلکی رفتار سے چلتی ہوا لمحہ بہ لمحہ تیز ہو رہی تھی.
جھکڑ چلنا شروع ہوئے اور تیز ہوا کے ساتھ سیٹیوں کی آوازیں آنا شروع ہو گئیں. قاتل …… قاتل ….. قاتل کی آوازیں تیز ہوا کی آواز کے ساتھ سنائی دے رہی تھیں.
غضنفر, خیام کو سہارا دے کر اب جلال شاہ کے پاس لے آیا تھا. ماہین پھر سے کہیں بھاگ گئی تھی. جلال شاہ سورۃ مکمل کرنے کے بعد خاموش ہو گئے. ان کے خاموش ہوتے ہی جھکڑ چلنا بند ہو گئے اور ہر طرف مکمل خاموشی چھا گئی.
جلال شاہ نے پانی پر دم کیا اور وہی پانی غضنفر کو اس کی چھاتی کے زخم پر گرانے کا کہا. غضنفر نے جیسے ہی چھاتی پر پانی بہایا, ماہین کے دئیے ہوئے زخم میں سے بدبودار پس بہنا شروع ہو گئی. درد اور تکلیف کے اظہار کے بعد غضنفر کا زخم بہتر ہو گیا اور تکلیف رفع ہو گئی.
غضنفر …… سیڑھیوں سے لے کر اوپر سامنے والے کمرے تک میرا دم کیا پانی چھڑکو. جلال شاہ بولے.
غضنفر نے حکم کی تعمیل کی اور گھر کے ہر کونے میں پانی چھڑکنا شروع کر دیا. شروع میں تو مکمل سکون رہا لیکن پھر اچانک گھر کے ہر کونے سے کاکروچ نکلنا شروع ہو گئے. درجنوں, سینکڑوں اور پھر پورے گھر سے لاکھوں کاکروچ باہر کی طرف دوڑے. غضنفر اتنے کاکروچ دیکھ کر واپس لاؤنج کی طرف بھاگا جہاں جلال شاہ اور خیام کے سامنے خون سے لتھڑی ماہین چوپائے کی طرح کھڑی تھی.
اس کی آنکھیں لال انگارا ہو رہی تھیں اور مونھ پر خون لگا ہوا تھا جو اب بھی اس کے ہونٹوں سے ٹپک رہا تھا.
بچی کو چھوڑ کر باہر آؤ ….. جلال شاہ بولے.
نہ نہ نہ نہ …. جا جا جا جا جا جا ….. تو جا تو جا ….. قاقاقاقاتل ….. قاقاقاقاتل …… اب ماہین غضب ناک انداز سے خیام کی طرف دیکھ رہی تھی. وہ جلال شاہ کی باتوں کا جواب ایسے لہجے میں دے رہی تھی جیسے کسی توے پر کوئی لوہے کا راڈ مار رہا ہو. مگر آواز کہیں دور سے آ رہی ہو. اٹک اٹک کر لفظ ادا ہو رہے تھے. کڑکڑاتے آہنگ سے.
چھوڑ دو اس بچی کو …… سامنے آکر بات کرو. تمہاری بات سمجھ نہیں آ رہی کیونکہ بچی کمزور ہے اور تم مضبوط ہو. دس کلو کے تھیلے میں تم نے سو کلو وزن ڈال رکھا ہے. جلال شاہ نے ماہین کے اندر موجود مخلوق سے کہا
نہ نہ نہ نہ ….. نہ نہ نہ نہ ….. ہم ہم ہم ہم…. کھر کھر کھر …. نہ نہ نہ نہ ….. چچ چچ چچ چچ ….. اب ایک ساتھ بہت سی مختلف آوازیں ماہین کے اندر سے آنے لگیں اور اس کا جسم جھٹکے کھانے لگا.
تو تم لوگ نہیں مانو گے؟ جلال شاہ چلائے اور ماہین کے ماتھے پر ہاتھ رکھ کر سورۃ الرحمن پڑھنا شروع کر دی. جب جلال شاہ یہاں پہنچے
“خلق الانسان من صلصال کالفخار وخلق الجان من مارج من نار”
چھو چھو چھو چھو …… نہ نہ نہ نہ نہ ….. قاقاقاقاتل ……. قاقاقاقاتل …. کٹ کٹ کٹ کٹ. جلال شاہ نے اپنے ساتھ لایا ہوا پانی ماہین کے مونھ میں ڈال دیا. جھینگروں اور مینڈکوں کی تیز آوازیں آنا شروع ہو گئیں. پانی پیتے ہی ماہین نے الٹی کر دی. اس کے مونھ سے آنتوں پھیپھڑوں کے ٹکڑے اور کلیجہ نکلا جو وہ غالباً خضر کے کھا چکی تھی. الٹی کرتے ہی ماہین بے ہوش ہوکر گر پڑی جس کو خیام نے اپنے بازوؤں میں سنبھال لیا.
یہ آیات ہیں ….. بچی کے گلے میں ڈال دو. جلال شاہ نے تعویز خیام کے حوالے کیا جس نے وہ تعویز ماہین کے گلے میں باندھ دیا. آیات گلے میں ڈالتے ہی وہ سامنے آگیا …….
یا رب العالمین. خیام کا حیرت سے مونھ کھل گیا.
یا اللہ یہ کیا چیز ہے. غضنفر بولا ………….
اشتخ شدوس ……. جلال شاہ زور سے بولے
یہ کیا چیز ہے . غضنفر نے حیرت سے جلال شاہ کی طرف دیکھا
اشتخ شدوس ……. جلال شاہ دوبارہ زور سے پکارے
ایک کریہہ المنظر شے چار ٹانگوں پر چلتی ہوئی تینوں کے سامنے آ گئی. اس جانور نما شے کا دھڑ بھینس جیسا تھا مگر قد کتے جتنا تھا. اس شے کی صورت خنزیر جیسی تھی مگر جیسے کسی نے چہرے پر چھریوں سے ہزاروں چرکے لگائے ہوں. جسم کی چمڑی یا کھال ایسی جیسے کسی نے آگ میں جھلسا دیا ہو.
غضنفر کی حالت خوف کے مارے پتلی ہو رہی تھی لیکن وہ جلال شاہ کی طرف حیران ہو کر دیکھ رہا تھا جو غضبناک نظروں سے خنزیر نما شے کو گھور رہے تھے.
کیوں تنگ کر رہے ہو بچی کو تم. جلال شاہ بولے. اتنا پوچھنا تھا کہ بہت سے جنات سارے گھر میں کھڑے ہوئے نظر آئے جو خیام کو غصے سے گھور رہے تھے.
بول اشتخ شدوس … جلال شاہ نے جانور کو مخاطب کیا.
اشخ شدوس ایسی عجیب آواز اور زبان میں بولا جس کی سمجھ سوائے جلال شاہ کے غضنفر اور خیام کو نہ آ سکی.
انہیں معلوم نہیں تھا کہ وہ تمہارا بیٹا ہے. جلال شاہ نے اس جانور کے رینکنے کا جواب دیا. لاعلمی میں کیے گئے عمل کی پکڑ نہیں ہو سکتی. یہ قانون ہے اشتخ شدوس اور تم اس قانون کا جانتے ہو.
خنزیر پھر تیز آواز سے بولا.
نہیں. اسلام میں بے گناہ جانور کا خون بہانا بھی جائز نہیں ہے. بلامقصد اس قسم کا کوئی فعل درست نہیں ہے. جلال شاہ نے خنزیر کو جواب دیا.
خنزیر نے رینکنا شروع کر دیا.
تمہیں انہیں چھوڑنا پڑے گا. بچی کے بلیدان کی بات مت کرو. تمہارا بیٹا انہوں نے جان بوجھ کر نہیں مارا. جلال شاہ نے اشتخ شدوس سے کہا
یار یہ کیا ہو رہا ہے. غضنفر زمین پر بیٹھ کر خنزیر نما جانور اور جلال شاہ کی گفتگو سنتے ہوئے بولا. کیوں انہیں خنزیر کے سوالات کی سمجھ نہیں آ رہی تھی.
خاموش ہو جاؤ. جلال شاہ نے ہونٹوں پر شہادت کی انگلی رکھتے ہوئے غضنفر کو اشارا کیا.
چھوڑ دو بچی کو اشتخ شدوس. اور باقیوں کو لے کر اس گھر سے نکل جاؤ. جلال شاہ بولے
خنزیر کے مونھ سے چل چل چل چل نکلا. شا شا شا شا ….. شاید وہ اپنی آواز میں جلال شاہ کا نام لے رہا تھا. غضنفر نے اشتخ شدوس کی طرف حیرت سے دیکھا.
اچانک جلال شاہ کا چہرہ متغیر ہو گیا اور غصے سے کان اور چہرہ سرخ ہو گئے.
تم نے کئی گھرانے تباہ کیے ہیں اشتخ شدوس, آج میں ویسے بھی تجھے معاف کرنے کا سوچ کر نہیں آیا تھا. ویسے بھی بدلہ اس چیز کا ہوتا ہے جو ناجائز کی گئی ہو. کب اور کیوں مارا خیام اور اس کی بیوی نے تمہارے بیٹے کو. جلال شاہ نے اشتخ شدوس سے پوچھا.
یہ پوچھنا تھا کہ خنزیر غائب ہو گیا اور خیام بے ہوش ہو گیا.
خیام ہوش میں آیا اور جلال شاہ کی جانب رخ کر کے بولا;
ایک دن میرا بیٹا سانپ کی صورت گھر میں گھوم رہا تھا. یہ گھر ہمارا ہے ….. یہ گھر ہمارا ہے ……. مزمل اعظم کالے علم کا بادشاہ تھا. اس نے اپنے علم سے بہت سے جنوں کو اپنا تابع کر رکھا تھا. اس نے ہمیں بھی اپنے قابو میں کر رکھا تھا. ہم نے کبھی کسی کا برا نہیں چاہا. ہم کسی کا نقصان نہیں کرتے لیکن جس کی تباہی کا حکم ملے تو ہم سب کچھ کر گزرتے ہیں. پھر مزمل اعظم مر گئے اور سب جنات آزاد ہو گئے. ہم بھی آزاد ہو گئے. اب ہم کسی کے تابع نہیں تھے. پھر ادھر مزمل اعظم کا بیٹا مدثر اعظم رہنے آیا. ہم نے اس کو بھی یہاں نہیں رہنے دیا. یہ گھر ہمارا ہے …… یہ گھر ہمارا ہے ……. ہم نے ایسے ہی نہیں حاصل کیا یہ گھر. ہم جنات سے قربانیاں لی گئیں تب جا کر ادھر رہے ہم. پھر اچانک مدثر اعظم گھر بیچ کر چلا گیا. ہم صرف خیام اور اس کے بچوں کو ڈرا کر بھگانا چاہتے تھے اس لیے چھوٹے موٹے نقصان کرتے تاکہ یہ لوگ گھر چھوڑ دیں. لیکن یہ نہیں گئے …. لیکن یہ نہیں گئے ……. الٹا ہمارے گھر میں نمازیں شروع کر دیں. اس دن میرا بیٹا سانپ کی صورت خیام کی بیوی کے سامنے آیا تاکہ وہ نماز نہ پڑھے اور یہ لوگ گھر چھوڑ دیں. لیکن الٹا یہ لوگ ہمارے گھر میں قرآن پڑھنا شروع ہو گئے اور میرے بیٹے یرشب کو مار دیا اور اس پر ستم یہ کہ اسد نے ہمیں نقصان پہنچانے کی کوشش کی. اس کے بعد میرے سب خاندان والوں نے خیام کی بیٹی ماہین کے جسم میں رہنے کا فیصلہ کیا اور ان سب کو مزید تکلیف دینا شروع کر دی …. اشتخ شدوس سب کچھ تفصیل سے بتا رہا تھا …….
یہ کیوں لایا تھا عابد حسین کو. اُس نے ہمارے کئی لوگ مار دئیے, بند باندھ کر … گرہ لگا کر. گھر بھی ہمارا اور لوگ بھی ہمارے مارے ان لوگوں نے …. ایک عجیب کھردری آواز خیام کے اندر سے نکلی جو اشتخ شدوس کی آواز سے یکسر مختلف تھی. یہ اشتخ شدوس کی بیوی زلزلالہ تھی جو خیام کے وجود کا سہارا لے کر جلال شاہ سے مخاطب تھی.
یہ ہمارا قیدی ہے … اس کی بیٹی کو جب مار دیں گے تب ہمارا بدلہ پورا ہوگا. وہ آواز تیز ہو چکی تھی …….
تمہارا بیٹا غلط فہمی میں مارا گیا …. تم نے غضنفر کا بچہ کیوں مارا ….. جلال شاہ نے غصے سے پوچھا …..
میرا بچہ مار دیا. غضنفر رونے لگا ….
ہاں مارا ہم نے ….. غضنفر کا کیا بگاڑا تھا جو وہ تمہیں لینے گیا. اس لیے غصے میں اکر میں نے اس کا بچہ مار دیا … کھردری آواز سنائی دی
پھر تو اب تم بدلہ دو …. اس بات پر کیا کہنا ہے تمہارا مکار بدروح …. جلال شاہ غصے سے بولے … میں نرمی برت رہا ہوں تو یہ نہ سمجھو کہ میں چھوڑ دوں گا تمہیں. جلال شاہ بولے
غضنفر اپنے بچے کی موت کا جان کر مسلسل رو رہا تھا ….
خیام نے جان بوجھ کر کچھ نہیں کیا. یہ سب اتفاق تھا. وہ سمجھا سانپ ہے. اگر اس کو چھوڑ دیا تو وہ کسی کو کاٹ سکتا ہے. جلال شاہ نے خیام کی ترجمانی کی. خیام نے تمہارے بیٹے پر وار کیا یہ ایک اتفاق تھا. بتاؤ تم نے جانتے بوجھتے کیوں مارا خضر کو. جلال شاہ غصے سے بولے اور پڑھائی شروع کر دی …….
اٹھو غضنفر … میرے پیچھے آؤ. جلال شاہ نے غضنفر کی جانب دیکھ کر اسے چلنے کو کہا جس نے حکم کی تعمیل کی.
جلال شاہ برگد کے درخت کے قریب پہنچے جہاں پہلے ہی کوئی شے دھواں بن چکی تھی. لان, باغ, کمرے, باورچی خانے, بیت الخلاء, دوسری منزل. جلال شاہ تیزی سے پورے گھر میں گھوم رہے تھے … غضنفر بمشکل ان کی رفتار کا ساتھ دے پا رہا تھا.
ہلکا ٹھنڈا دھواں ہر طرف نظر آ رہا تھا, جیسے کہر. جلال شاہ جس سمت جاتے وہاں کہر دکھائی دیتی, ہلکا دھواں اور دھند.
اللہ اکبر اللہ اکبر
اشھدوا ان لا الہ الا اللہ
اشھدوا انا محمدا رسول اللہ
قل اعوذ برب الفلق
من شر ما خلق
ومن شر غاسق اذا وقب
ومن شر النفاثات فی العقد
ومن شر حاسد اذا حسد
قل اعوذ برب الناس
ملک الناس
الہ الناس
من شر الوسواس الخناس
الذی یوسوس فی صدور الناس
من الجنت والناس
جلال شاہ پڑھتے جا رہے تھے اور پھونکتے جا رہے تھے. جھینگروں, مینڈکوں کی آوازیں اور چمگادڑوں کی چیخ و پکار تیز تر ہوتی جا رہی تھی.
غضنی ….. جلال شاہ زور سے چلائے. برگد کے پیڑ کے نیچے چلو.
جلال شاہ کی بات سن کر غضنفر ان کے ساتھ برگد کے پیڑ کے نیچے کھڑا ہو گیا.
برگد کے پیڑ تلے برگد دکھائی نہیں دے رہا تھا. غضنفر اور جلال شاہ اب کسی اور جہت میں داخل ہو چکے تھے. یہ لق و دق صحرا تھا جہاں دور دور تک سوائے ریت کے کچھ نہیں تھا.
چلو غضنفر وہاں سامنے. جلال شاہ نے غضنفر کا ہاتھ پکڑا اور یہ دونوں دور ایک عجیب وضع کے درخت کی جانب چل پڑے. وہاں درخت تلے ایک شخص کرسی لگائے بیٹھا دکھائی دیا.
ہم نے آگے جانا ہے …. جلال شاہ نے اس لمبے تڑنگے شخص سے مخاطب ہوتے ہوئے کہا جو سر پر کپڑا رکھے اونگھ رہا تھا.
اس کتے کے ساتھ جانا چاہتے ہو? اس لمبے نے جلال شاہ سے پوچھا
ہاں, یہ ساتھ جائے گا. جلال شاہ نے اس شخص کو جواب دیا
یتیموں کا مال کھانے والے یہاں سے آگے نہیں جا سکتے. اسے یہیں چھوڑ جاؤ جلال ورنہ تمہارا کام نہیں بنے گا.
جلال شاہ نے غضنفر کی جانب دیکھا جو ہونقوں کی طرح ان دونوں کی گفتگو سن رہا تھا.
تم نے کس کا مال کھایا ہے غضنفر. جلال شاہ نے پوچھا
وہ …….. غضنی ہکلانے لگا تو لمبا تڑنگا بولا. اس نے بھتیجی کی جائیداد بیچ کھائی ہے. پراپرٹی کا کام کرتا ہے. سالا حرام خور. یہاں سے آگے گیا تو اس کی ہڈیوں کا سرمہ بنا دوں گا. اچانک وہ لمبا تڑنگا کھڑا ہوا تو اس کا سر آسمان کو چھونے لگا. یہ جہنم کا ایندھن بنے گا. یہ …….. یہ ……. یہ اگر نہ سدھرا تو میں اس کی آنتیں نکال کر جی ٹی روڈ پر پھیلا دوں گا. ٹرک کے نیچے ……
تم جاؤ جلال شاہ. اس کو میرے پاس چھوڑ جاؤ.
جلال شاہ نے ڈرے ہوئے غضنفر کو تسلی دی کہ یہ شخص اسے کچھ نہیں کہے گا. اگر انہیں غضنفر کا یہ گھناؤنا فعل معلوم ہوتا تو وہ اسے کبھی بھی اس مقام تک نہ لاتے مگر اب وہ یہیں کھڑا رہے تاکہ وہ آگے جاکر اشتخ شدوس اور دیگر جنات کا معاملہ مستقلاً حل کر سکیں.
مرتا کیا نہ کرتا. غضنفر وہیں لمبے تڑنگے کے پاس رہا اور جلال شاہ اس درخت سے آگے نکل گئے. بہت دیر بعد جب وہ لوٹے تو ان کے ہاتھ میں ایک کھجور, تین کتابیں اور ایک نومولود کی کفن میں لپٹی نعش تھی. اس دوران غضنفر کا رنگ پیلا پڑ چکا تھا اور وہ زمین پر چت لیٹا ہوا تھا.
اٹھو غضنفر, واپس چلنا ہے. جلال شاہ بولے
غضنفر بمشکل اپنے قدموں پر کھڑا ہوا اور جلال شاہ کے ساتھ واپس چل پڑا.
اب یہ دونوں برگد کے پیڑ تلے دوبارہ کھڑے تھے.
غضنفر …… یہ نعش لے جاؤ اور ساتھ قبرستان میں سپرد خاک کر دو. یہ نعش مزمل اعظم کے پہلے بچے کی ہے جسے اس نے کامل جادوگر بننے کے لیے قتل کیا تھا. اس کا جنازہ پڑھایا جا چکا ہے. اسے دفنا کر دعا بھی کرنا. پھر واپس اسی گھر پہنچو, تم سے ضروری بات کرنی ہے.
غضنفر نعش لے کر ملحقہ قبرستان چلا گیا جبکہ جلال شاہ نے خیام کے سرہانے بیٹھ کر ہاتھ میں پکڑی تینوں کتابوں کو آگ لگا دی. یہ کتابیں کالے جادو سے متعلق تھیں اور مزمل اعظم کی ملکیت تھیں. اس نقصان دہ علم کا ختم ہونا ضروری تھا.
خیام اب ہوش میں آ چکا تھا جسے جلال شاہ نے پانی پلایا اور غضنفر کے انتظار کا بتایا.
***********************
تنوع کے فقدان کا عذاب
لاہور ایئرپورٹ سے فلائی کرنے والا ہوموپاکیئن دو تین گھنٹے بعد دوبئی یا دوحہ میں اترتا ہے تو ایک مختلف...