(Last Updated On: )
جدوں نعت لکھناں قلم دی ٹھرے جیبھ
سڑے شالا جہڑی ثنا ناں کرے جیبھ
خدا دے جے محبوب تے ناں مَرے جیبھ
کراں کی میں جیوے تے بھاویں مَرے جیبھ
ادب نال چھِک چھِک محبت دے بوکے
مدینے دے کھوہ توں گھڑے آ بھرے جیبھ
نبی پاک دے عشق! سمجھا دوہاں نوں
کہ ناں ناں کرے دل، تے ہاں ہاں کرے جیبھ
کدی مینوں ڈاچی نظر آوے آقا
کھُرے اس کھَرے نوں ای چم چم کھَرے جیبھ
جدوں ڈوبدی تے بڑے ڈوب دیندی
کریما کرم نال میری ترے جیبھ
ثنا دی ہے تلوار دو دھاری اعجاز
ادب توں قدم ڈردی ڈردی دھرے جیبھ
