(Last Updated On: )
جھوک بختاں دی وسیسو مِری سرکار کدوں
آپ دے پیر چمیسی مِرا گھر بار کدوں
نین دیدار دے پوسن بھلا گل ہار کدوں
نعت رو رو کے سنوسن ترے دربار کدوں
نِت وچھوڑے دے میں پتناں تے صدا ایہو دیاں
واسیا! پار دیا اوسیں بھلا اروار کدوں
زلف کستوری ہلا دے کہ مہک جاوے سخن
مِرے ہر شعر چوں اوسن ترے مہکار کدوں
کملی دنیا نہ سمجھدی ترا موہ لین دا گُر
کم نظر وانگ اے کردی بھلا تلوار کدوں
جام بھر بھر کے پلا اپنے توں مے خاراں نوں
ٹھیک اُنج ہونے ازل دے بھلا بیمار کدوں
زندہ اعجازؔ نیں جگ تے اجے فرعون جئے
آپ دے خُلق نوں جھکسی بھلا سنسار کدوں
