جانے رہوارِ خِرد تیرا کدھر جاتا ہے

جانے رہوارِ خِرد تیرا کدھر جاتا ہے
علم کے نور سے اکثر یہ بپھر جاتا ہے
ساعتیں آبِ رواں ہیں کہ بہی جاتی ہیں
بے بصر ہے کہ ہر اک موج سے ڈر جاتا ہے
چوم لیتا ہے فلک جب بھی میری سوچوں کو
لفظ و آہنگ میں ایک نور سا بھر جاتا ہے
ذہن بنجر ہوئے جاتے ہیں تدبر کے بغیر
لفظ و معنی سے نکل رنگِ ہنر جاتا ہے
شورش و شور کا ہوتا نہیں پتھر پہ اثر
نفس معصوم تو آہٹ سے بھی ڈر جاتا ہے
عقل کے زائچے کھاتے ہیں مقدر سے مات
حسنِ اعمال سے ہر لمحہ سنور جاتا ہے
زخم دے جاتی ہے ٹوٹے ہوئے شیشے کی کرچ
خون چھلکاتا ہے سپنا جو بکھر جاتا ہے
کھوکھلا کرتی ہے بسیار نویسی اصغرؔ
حرفِ تکرار سے مفہوم ٹھٹھر جاتا ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔۔