جمال اویسی کی چار غزلیں

جمال اویسی(در بھنگا)

میں ہمیشہ کسی خیال میں گم

ناتراشیدہ خدو خال میں گم

میں بہت آگے وقت کی حد سے

زندگی اب تک اپنے حال میں گم

کوئی بے ربط سا خیال تو ہے

اور میں اپنے اعتدال میں گم

کاش تم بے حصار ہو جاؤ

ایک شاعر ہو ماہ و سال میں گم

وقت آگے نکلتا جاتا ہے

اور اویسی ہے اپنی چال میں گم

۔۔۔۔۔۔۔۔۔۔۔۔۔۔۔۔۔۔۔

گھر سے نکل اب باہر چل

دنیا دیکھ مزاج بدل

انگاروں کو ہاتھ میں لے

پاؤں سے کانٹوں کو مسل

کم کم بولنا اچھا ہے

تندی چھوڑ دے ،لہجہ بدل

اپنے کئے پر نادم ہو

خاک اپنے چہرے پر مل

منزل کتنی دور ہے اب

کندھے ہوئے جاتے ہیں شل

۔۔۔۔۔۔۔۔۔۔۔۔۔۔۔۔۔

ریگِ رواں ہی ریگِ رواں ہے

دریاؤں کا نام کہاں ہے

پیاسے لبوں کا حال نہ پوچھو

دل میں آگ اور منہ پہ دھواں ہے

زندہ جس کے دَم سے تھا صحرا

وہ دیوانہ آج کہاں ہے

ہونٹوں پر بربادی کے نغمے

نسل ہماری مرثیہ خواں ہے

شاعری فاقے کرواتی ہے

کارِجنوں اب کارِ زیاں ہے

۔۔۔۔۔۔۔۔۔۔۔۔۔۔۔۔۔۔

شام ہوتے ہی لوٹ آئیں گے

ہم پرندے بھی گھر کو جائیں گے

گیت،نغمے اداس پھول سہی

ہم تو قرطاس پر کھلائیں گے

جنگلوں میں خزاں کے آتے ہی

دن بہاروں کے یاد آئیں گے

جلتے، بجھتے چراغ گیتوں کے

کچھ کتابوں میں جگمگائیں گے

تم جب آواز دو گے یادوں کو

ہم بھی بھولے سے یاد آئیں گے