جلدی میں کچھ تو وہ بھی تھا، عجلت میں ہم بھی تھے

جلدی میں کچھ تو وہ بھی تھا، عجلت میں ہم بھی تھے
اس کو بھی کچھ جنون سا، وحشت میں ہم بھی تھے
مدت کے بعد رونے کی آخر فضا بنی
کچھ دل شکستہ وہ بھی تھا، فرصت میں ہم بھی تھے
بے اعتباریاں ہی جدا ئی کا ہیں سبب
اس کو اگر تھا خوف تو دہشت میں ہم بھی تھے
عیاریاں بنا کسی کوشش کے آگئیں
آخر کو شہر زادوں کی صحبت میں ہم بھی تھے
اچھا ہوا کسی نے بھی رکھا نہ ہم کو یا د
لوگوں کو بھول جانے کی عادت میں ہم بھی تھے
کس دل جلے نے موڑدیا منزلوں کا ر خ
رستوں کے اختصار سے کلفت میں ہم بھی تھے
اب تو شریکِ بزم وہ روشن دماغ ہے
کل تک تو نا شناسی کی ظلمت میں ہم بھی تھے
۔۔۔۔۔۔۔۔۔۔۔۔۔۔۔۔۔۔۔۔۔۔