اس کہانی پہ مجھے آج ہنسی آتی ہے

اس کہانی پہ مجھے آج ہنسی آتی ہے
لوگ کہتے تھے پشاور میں پری آتی ہے
آج بیمار پڑا ہوں تو مجھے یاد آیا
صرف اک شخص جسے چارہ گری آتی ہے
قصہ گو!ٹھیک وہاں پر مرا کردار بنا
اس کہانی میں جہاں سبز پری آتی ہے
ان کو بچپن میں بہت غور سے دیکھا میں نے
گرتے تاروں کو بہت دربدری آتی ہے
روشنی ساتھ نبھانے سے جہاں ڈر جائے
ان اندھیروں کو وہاں ہم سفری آتی ہے
یہ کرامت ہے مرے یار کہ سوکھی ٹہنی
تیری تصویر میں آئے تو ہری آتی ہے
یہ وہ فن ہے جو بڑوں کو بھی نہیں آتا ہے
چھوٹے بچوں کو ہر اک بات کھری آتی ہے
زندگی سے بھی کوئی تازہ خبر ملتی نہیں
اور اخبار سے بھی بے خبری آتی ہے
۔۔۔۔۔۔۔۔۔۔۔۔۔۔۔۔۔۔۔۔۔۔۔