(Last Updated On: )
ہووے قضا نہ حج کِتے ڈردا ہمیش ہاں
اس لئی طواف نعت دا کردا ہمیش ہاں
وسدے نیں ہر جہان تے تیرے کرم دے مینہ
کِن مِن خمار دی اے میں ٹھردا ہمیش ہاں
ڈُب کے جدوں خیال دی آکڑ اے مر گئی
تیرے خیال وچ میں تے تردا ہمیش ہاں
اکھ وچ مِرے نبی کدوں تشریف لان گے
دیوے جگا کے شوق دے دھردا ہمیش ہاں
دل آپ دی گلی جدوں کعبہ سمجھ لئی
پِٹ پِٹ کے نفس آکھدا ہردا ہمیش ہاں
مرنوں تسیں ڈرائو نہ آقا دی یاد وچ
میں تاں جناب جیندا تے مردا ہمیش ہاں
اعجازؔ خیر فضل دی دیندے حضور نیں
اکھرا دیاں میں جھولیاں بھردا ہمیش ہاں
