’’میری مراد اس طبقے سے ہے جسے ہر بات کا ٹھوس اور بین ثبوت چاہیے جسے ہر کام ناپ تول کر کرنے کی عادت ہے جس کے لئے محبت کا ایک خاص معیار ہے جو چکوری کو چاند تک پہنچنے کے لیے میلوں، کلومیٹروں اور گھنٹوں کا حساب کرتا ہے جو پروانے کے جلنے کے لئے شمع کا درجہ حرارت ناپتا ہے جو آنسوؤں کے لیے مقیاس المطرڈھونڈتا ہے۔میں سمجھتا ہوں شاعری فقیروں کا حصہ ہے، حساب دانوں اور سائنس دانوں کانہیں۔‘‘
(شعری مجموعہ شہاب ثاقب میں ہمّت رائے شرما جی کے پیش لفظ سے اقتباس)
غزلیات سے اشعار
آج قسمت میں اگر صحرانوردی ہے تو کیا
منزلیں ڈھونڈیں گی اک دن میرے قدموں کے نشاں
۔۔۔۔۔
شرط باندھی ہے پھر قیامت سے
سامنے آئیے خدا کے لیے
میں خدائی سے خود سمجھ لوں گا
میرے ہو جائیے خدا کے لیے
۔۔۔۔۔
اپنی فریب خوردہ نگاہیں جدھر اُٹھیں
نظریں چُرا چُرا کے نظارے نکل گئے
۔۔۔۔۔
بھیڑ جلوؤں کی یہ کیسی ہے کہ رخساروں پر
جگہ دیجئے مری نظروں کو بھی تِل دھرنے کی
ان ڈھلکتے ہوئے اشکوں میں یہ کیا عادت ہے
چند ٹوٹے ہوئے سیاروں کو سر کرنے کی
۔۔۔۔۔۔
ابھی نصیب میں لکھی ہیں ٹھوکریں شاید
ابھی تو باقی ہیں احسان اس زمانے پر
۔۔۔۔۔
بزم ہستی کو پلٹ کر رکھ دیا
زندگی کے خواب کی تعبیر نے
۔۔۔۔۔
دیکھتے دیکھتے نظارے بدل جائیں گے
انقلابات کے آثار نظر آتے ہیں
۔۔۔۔۔
میں تب بھی ناخدا ہوتا ہوں خود اپنے سفینے کا
کہ جب دریائے دل کی موج خود طوفان ہوتی ہے
۔۔۔۔۔
مرے سوا تری دنیا میں کون ہے یارب
جو تیرے بخشے ہوئے غم سے اتنا پیار کرے
۔۔۔۔۔
جو مرد مومنِ غازی علی کا بندہ ہے
کہو اجل سے ذرا اس سے آنکھیں چار کرے
۔۔۔۔۔
رہے وہ جان جہاں، یہ جہاں رہے نہ رہے
مکیں کی خیر ہو یارب مکاں رہے نہ رہے
۔۔۔۔۔
مانا کہ آپ دل کے جنازے کے ساتھ تھے
لیکن حضور! آپ بہت دور دور تھے
۔۔۔۔۔
نظموں سے اقتباس
کوئی روتا ہے شب کو اوس بن کر
سناتے ہیں جب اپنی داستاں گل
(گلبانگ)
۔۔۔۔۔
ہجوم یاس کو آنکھوں میں پا کر
نکل آتے ہیں جھٹ گھبرا کے آنسو
(آنسو)
۔۔۔۔۔
ایک دھندلا سا نشاں ہے جسے منزل کہہ لو
نامرادی کا ہے مسکن جسے اب دل کہہ لو
(جدائی)
۔۔۔۔۔
کبھی وہ دن تھے کہ اپنا بھی آشیانہ تھا
نہ جانے ایک حقیقت تھی یا فسانہ تھا
۔۔۔۔
شب ستم تھی اچانک برس پڑے تھے نجوم
اکیلی جان پہ ٹوٹا تھا بدلیوں کا ہجوم
(گردش دوراں)
۔۔۔۔۔
آپ ہی آپ سلگ اٹھتے ہیں تاروں کے حباب
آپ ہی آپ چھلک جاتی ہے چشم پُر آب
کوہساروں سے لپٹ جاتے ہیں وارفتہ سحاب
آ کے سو جاتے ہیں آنکھوں میں تھکے ماندے سراب
(آمد)
۔۔۔۔۔
اگر میسر نہیں ہیں تنکے، ہوا ہے دشمن اگر زمانہ
بجائے تنکوں کے بجلیوں سے بنا کے چھوڑوں گا آشیانہ
(ارادے)
۔۔۔۔۔
حمد باری کے بعد اے خامہ
مئے وحدت کا بھر کے لا اک جام
دل میں رکھتا ہوں ایک جذبۂ پاک
ہے مجھے احترام پاک کلام
میرے مولا ، مرے خداوندا
تیرے محبوب کاہوں میں بھی غلام
اہلِ اسلام کو ’’مبارک ہو!‘‘
عید میلاد بانی اسلام
۔۔۔۔۔
گیتوں سے اقتباس
اے مدھ ماتی شام گھٹاؤ
جاؤ دیش پیا کے جاؤ
عرض ہماری سنو سجنوا سپنوں میں نہیں آؤ
ہمری ہنسی اڑاتے ہیں ہنس ہنس کر من کے گھاؤ
اے مدھ ماتی شام گھٹاؤ۔۔۔۔
۔۔۔۔۔
ساجن!
کون بندھا وے دھیر
دکھ وہ جانیں جو سہتے ہیں
ان نینوں میں دو رہتے ہیں
اک ساجن اک نیر
ساجن کون بندھاوے دھیر
۔۔۔۔۔
ذرا تھم جا تُو اے ساون! مرے ساجن کو آنے دے
مرے روٹھے پیا کو پھر مری بگڑی بنانے دے
میں تیری بجلیوں کی گوٹ آنچل پر لگاؤں گی
تری کالی گھٹائیں پیس کے کاجل بناؤں گی
تری ہلکی پھواریں گوندھ کے مالا بناؤں گی
سلونے کے رجھانے کو مجھے سپنے سجانے دے
ذرا تھم جا تُو اے ساون! مرے ساجن کو آنے دے
۔۔۔۔۔
قطعات اور اشعار کے آخری حصہ سے چند اشعار
پاؤں سے لپٹی ہوئی ہے کوچۂ جاناں کی خاک
جانے کب سے زیرِ پا منزل لیے پھرتا ہوں میں
۔۔۔۔
کیا کرے تدبیر کوئی اور سمجھائے بھی کیا
خود مصور نے بگاڑا ہو اگر تصویر کو
۔۔۔۔
لٹ کے رہ جائیں ستاروں کے نصیب
چاندنی راتوں میں یہ اندھیر کیا
تابشِ نور جمال یار سے
دیدۂ نم کو پسینہ آگیا
۔۔۔۔
فسانۂ شب غم یوں تو کوئی خاص نہیں
ذرا سی برق نوازی تھی آشیانے کی
۔۔۔۔
خود نہیں واقف ہم اپنے نام سے
کیا شکایت گردشِ ایام سے
جانِ مضمون بتا کیسے سمٹ کر آئی
تیرے رخساروں پہ سرخی مرے افسانے
۔۔۔۔
رہو دل میں، نہ جھانکو چشم تر سے
بھری برسات میں نکلو نہ گھر سے
۔۔۔ ۔
خیر گزری کہ جبیں سائی پہ ماتھا ٹھنکا
ورنہ اس بت کے لیے مفت میں کافر بنتے
۔۔۔۔۔
