حمدِ باری تعالیٰ

مرزا رفیق شاکر(اکولہ)

ترا رنگ و نور ہے کو بہ کو تری شان جلّ جلالہ‘

تو نہیں کسی کے بھی روبرو تری شان جلّ جلالہ‘

ہے تری رضا مِری آرزو تری شان جلّ جلالہ‘

ترا ذکر ہے،تری گفتگو،تری شان جلّ جلالہ‘

کہیں برگ و گل میں ثمر میں ہے،کہیں کہکشاں میں قمر میں ہے

جہاں دیکھیے وہیں تو ہی تو،تری شان جلّ جلالہ‘

وہ ہوں عرش پر کہ ہوں فرش پر،ترے عبد ہیں سبھی جن بشر

ہے ترا ہی عالَمِ رنگ و بو تری شان جلّ جلالہ‘

تو سمیع ہے تو بصیر ہے تو علیم ہے تو خبیر ہے

کہ دلوں کے راز بھی جانے تو  تری شان جلّ جلالہ‘

ترے نیک بندوں میں اے خدا،رہے یہ بھی شاکرِ بے نوا

اسے کر دے ویسا ہی نیک خُو تری شان جلّ جلالہ‘