حمدِ باری تعالیٰ

فرحت حسین خوشدل(ہزاری باغ)

مِرا یقین ترا ہے، مِرا گماں تیرا

زباں جو ساتھ دے یارب تو ہو بیاں تیرا

زمیں سے تا بہ فلک ہر نشاں،نشاں تیرا

ہے کائنات کا اک ایک کارواں تیرا

تری ثنا کا تسلسل ازل سے تا بہ ابد

کہ ہر زباں پہ مسلسل ہے بس بیاں تیرا

مِری زباں پہ ہیں الفاظ نت نئے یارب

مِری زباں پہ ہے احسان بے کراں تیرا

تمام شئے ہے تصرف میں بس ترے مولیٰ

زمیں بھی تیری، فلک تیرا، لا مکاں تیرا

ثنا سے تیری ہر اک لفظ ہو گیا روشن

مِرے سخن میں جو لذت ہے وہ بیاں تیرا

تمام شئے میں نظر آئی تیری صنّاعی

ہے جلوہ گر تری تخلیق سے نشاں تیرا

ترے ہی ذکر سے آباد میرا سینہ ہے

ہر ایک دل پہ لکھا حرف داستاں تیرا

عزیز تر ہے نبیؐ کا یہ قول مستحسن

ہر ایک درد کا درماں،درِ اماں تیرا

کہاں سے لائے گا خوشدلؔ حَسین تر لہجہ

کہاں ہے تابِ سخن کر سکے بیاں تیرا