ہائیکو

سہیل احمد صدیقی (کراچی)

 ٭ کرنوں کی ہلدی

     دوشیزہ تو اک کونپل

      مرجھائے جلدی

 ٭    من کے سچوں میں

    ڈھونڈوں کھوئی مُسکانیں

            ننھے بچوں میں

٭     اڑتا پنچھی ہے

       مجنوں تیری بے تابی

        ریت پہ لکھی ہے

٭  جیون پیسہ بیل

     جس نے بہتر سمجھا ہے

      اس کی ریل پیل

  [پیسہ بیل:Money plant]

٭   جیسے ساگر ہو

     جاناں تیرے جذبوں کی

         ایسی گاگر ہو

٭    جیون سودا ہے

   پیار کے ستھرے بیجوں سے

         بڑھتا پودا ہے

٭   ساون بھادوں میں

         ہم تو اکثر بھیگے ہیں

           تیری یادوں میں

٭  یہ بھی ہے اک خواب

     کاش حقیقت بن جائے

        سایہ اور سراب

٭    بیکل لگتی ہے

     دروازے کے پیچھے سے

        مجھ کو تکتی ہے

٭   سچا ہے  فنکا ر

        دیکھو کیسے بُنتا ہے

         مکڑا  اپنا  تار

٭   مت سمجھو آساں

      ملنا جسموں ‘ روحوں کا

      مشکل  میری  جاں

٭     وادی کا جھرنا

          مجھ کو اکثر یاد آیا

           جاناں کا ہنسنا