ہدیۂ نعت

وظیفہ بنا ہے جو نامِ محمدﷺ
نگاہوں میں ہے صبح و شامِ محمدﷺ
محبت ہوشفقت ہورحمت ہودل میں
ہمارے لیے ہے پیامِ محمد ﷺ
ہے نبیوں میں اک خاتم الانبیاء کا
ہر اک شے سے اعلیٰ مقامِ محمدﷺ
نہ بعد ان کے دنیا کبھی دیکھ پائی
کہ جیسا تھا افضل نظامِ محمدﷺ
عبادت ریاضت میں کوئی نہ ثانی
مثالی تھا ماہِ صیامِ محمدﷺ
حدیثیں سبھی ان کی پھولوں سے بڑھ کر
ہے خوشبو ہی خوشبو کلامِ محمدﷺ
صداقت، امانت، عدالت سراسر
یہی دوستو ہے مرامِ محمدﷺ
زبانوں سے اقرار کافی نہیں ہے
عمل ہے حصولِ نظامِ محمدﷺ
درود ان پہ جو روز و شب بھیجتا ہے
فقط اس کو پہنچا سلامِ محمدﷺ
اسی پر خدا کے فرشتے ہوں نازل
ہو جس قلب میں احترامِ محمدﷺ
مجھے ان کی سیرت پہ رکھنا خدایا
رہے بن کے عامرؔ غلامِ محمدﷺ