گنہگار آں میں توں شاہا کرم کر

گنہگار آں میں توں شاہا کرم کر
کرم کر کرم کر کریما کرم کر

جگر وچ توں کھُب کھُب کے طیبہ دے کنڈیا!
کئی پھُل گلابی کھڑا جا کرم کر

نظر جھاڑو دل دی گلی وچوں دیندی
کدی آ خدا دے حبیبا کرم کر

وطن آگیا اے ہنیرے دی مٹھ وچ
کوئی اک نظر میرے آقا کرم کر

نشے غفلتاں دے میں پی پی کے سُتا
نصیبا جگا دے طبیبا کرم کر

مکا رات غم دی کدی طیبہ لے جا
ترس کھا مِرے تے نصیبا کرم کر

میں اعجازؔ کی آں خطا ای خطا ہاں
کرم ای کرم توں کرم آ کرم کر