(Last Updated On: )
فربہ اندامی و آہنگ بُرا لگتا ہے
مثلا پیرہنِ تنگ بُرا لگتا ہے
خاک زادوں کو تمنا تھی کہ فولاد بنیں
بعد میں ان پہ کھلا زنگ بُرا لگتا ہے
اُس کے ہوتے ہوئے دنیا تھی ہمیں قوسِ قزح
اب یہ عالم ہے کہ ہر رنگ بُرا لگتا ہے
ہیر ہم ایسوں کو مل کر بھی نہیں مل سکتی
ہم وہ کھیڑے ہیں جنھیں جھنگ بُرا لگتا ہے
کون ایجاد کہ موجد کی نہیں شکر گزار
کون تصویر کو ارژنگ بُرا لگتا ہے
شاعری فخر ہے تا وقتے کہ پیشہ نہ بنے
نام بن جائے اگر ننگ بُرا لگتا ہے
میں تو یہ سوچ کے ہوتا ہوں ترے ساتھ خراب
ایک پلڑے میں تو پاسنگ بُرا لگتا ہے
آپ کل تک جسے استاد کہا کرتے تھے
اب وہی صاحبِ فرہنگ بُرا لگتا ہے!
ہجر کر سکتا ہے صدیوں کا تفاوُت بھی قبول
وصل پھر وصل ہے فرسنگ بُرا لگتا ہے
اسی دنیا کے لئے چھوڑی تھی جنت کاشر
اب یہی خانۂ نیرنگ بُرا لگتا ہے
